پٹھو گرام

اے کھیݙ وسیب دی وݙی مزیدار تے بھڄ دھرک آلی کھیݙ ھ. ایندے وچ جیہڑیاں چیزاں استعمال تھیندین انہاں وچ ہک پٹھو ہوندن مطلب پھیکریاں دے گول گول ٹکڑے بݨائے ویندن. انہاں کوں پٹھو آہدن. ایندے علاوہ ہک ست رٻڑی ڈیں یعنی ڳوڑھی بال وی ہوندی ھ اتے ݙو پالٹاں ہوندین. سارے کماں کول پہلے ٹاس، بجھارت تھیندی ھ، جیہڑا ٹاس جت ویندے اوھا پالٹی واری کھیݙدی ھ تے ݙوجھی واری ݙیندی ھ. ایں کھیݙ وچ کھݙکاراں ڳݨتری تے کئی پابندی کائنی ہوندی. جتلی کھݙکار کھیݙن کھیݙ سڳدن. ول ایں کھیݙ وچ پٹھو ہک جاہ ہک ٻئے دے اتے رکھ ݙتے ویندن جیویں منارہ اسریندے. اوندے باد ہک دائن وی طے تھیندی ھ. اے سبھو کرݨ توں بعد ٹاس جیتݨ آلی پالٹی دا مورھی کھݙکار ڳوڑھی چا تے دائن تے آویندے اتے مخالف پالٹی پٹھوواں دے پچھوں کھڑی تھی ویندی ھ. پہلی ٹیم دا کھݙکار دائن توں پٹھوواں کوں نشانہ لیندے. اوندی کوشش ہوندی ھ جو ہک پٹھو ڈھاوے تے پچھوں کھڑے مخالفاں کول ڳوڑھی وی ناں پکڑیجے. کیچ نہ تھیوے. ایں وجہ نال او ڳوڑھی پٹھوواں کوں زور نال مریندے، ڳوڑھی زمین تے ٹپہ کھندی ھ تے پچھوں کھڑی کھݙکار ڳوڑھی کوں جھپیندن، ڳوڑھی جھپیج ونجے تاں اوں کھݙکار دی واری مک پمدی ھ ناں تاں او ول ٹک مریندے جے پٹھو ڈیہہ ونجن تاں ول او تے اوندی ٹیم پٹھو ول اونویں کھرکیندن، کھرک لانوݨ توں پہلے اوندی پالٹی یا پٹھوواں دی کھرک لانونڑ آلے کوں ڳوڑھی لڳ ڳئی تاں او واری مک ویندی ھ، ایویں سارے کھݙکار کھیݙدن تے ݙوجھی پالٹی دی واری امدی ھ او وی ایویں کھیݙدن. ایں کھیݙ وچ پٹھوواں دے ڈھانوݨ نال کھݙکار پرے بھج ویندن تاں جو کہیں کو ڳوڑھی نہ لڳے، ایں وجہ توں ایں کھیݙ وچ وݙی بھڄ دھرک ھ. ایں کھیݙ کوں زیادہ تر نینگر کھیݙدن، اے کھیݙ تفریح ویلھے سکولاں وچ کھیݙی ویندی ہئی. اڄکل تاں اے کھیݙ شئیت کتھائیں کھیݙی ویندی ہووے.