وَکھری ڳالھ م م رمضان ارائیں
۞ـــ وَکھری ڳالھ ـــ۞
م م رمضان ارائیں
(ایم فل سرائیکی)
ڈھیر ݙینہاں دی ڳالھ اے. سرائیکی وَسّوں دے علاقے جھنگ وچ ہک قدرت اللّہ شہاب ناں دا ڈپٹی کمشنر آن لڳیا اُوں" شہاب نامہ" کتاب لکھی. ـــ اوندے وچ ہک وکھریوَکھری ڳالھ دا تذکرہ کیتا. جو ہِک ݙینہہ جھنگ دا پرائمری سکول دا استاد رحمت الٰہی میݙےدفتر آیا. اُو کُجھ ݙینہاں بعد نوکری توں ریٹائرتھیوݨ والا ہا، اون٘دیاں تَرائے دھیریں جوان ہن، راہݨ سانگےاپݨا گھر تک وی کائنا ہا. پنشن ٻہوں تھوڑی بݨدی پئی ہَس، اُون٘کوں ہِکو کھپارا تےجھورا ہا جو ریٹائرمنٹ بعد کتھاں راہساں تےمیں نال کیا تھیسی؟دھیریں دی شادی، کھاوݨ پیوݨ، گھر دا خرچہ کیویں چلسی.اوں آ تےمیݙےنال ڳالھ مہاڑ کیتی جو سئیں آں پریشانی دےاِنہاں ݙینہواراں وچ کئی مہینےتھی ڳئن تہجد ویلھےرب تعالیٰ کنوں رو رو دعائیں منگداں.. کجھ ݙینہہ پہلےخواب وچ لڄپال آقاؐ دی زیارت نصیب تھئی اےجیندےوچ سوہݨےنبیؐ فرمائے جھنگ وَن٘ڄ تےڈپٹی کمشنر کُوں اپݨی مُشکل وَن٘ڄ ݙَسا. رب تعالیٰ تیݙی مدد کریسی.. پہلےتےمیکوں شک تھئے اےڄݨا ہِک کُوڑا خاب سُݨا میکوں جذباتی طورتےبلیک میل کرݨ دی کوشش نا پیا کریندا ھووے. میݙےرُخ دی کتاب پڑھ کراہیں رحمت الٰہی گِڑگِڑاوَݨ پئےڳیا تے نِمڑاں مُنہ کرآکھیا اگر کُوڑ الاواں ہا شئیت خدا دے ناں دا آکھاں ہا. لیکن حضور پاکؐ دےناں دا نمہی آکھ سَڳداں، اوندی ایں منطق والی ڳالھ تےحیران تھیاں تےاظہار کیتم"باخدا دیوانہ و بامصطفیٰ ہشیار باش"میݙا شَک ختم نہ تھیا لیکن میں سوچیا اگر اےڄَݨا غلط بیانی کنوں کم گھندا پئےاینجھی عظیم ہَستی دےناں مبارخ دےاولے جین٘دی لاڄ رکھݨ اساں ساریں دا فرض اے. ایں سلسلے میں رحمت الہٰی کُوں تَرائےہفتیاں دےبعد آوݨ دا آکھیا. او وَلدا وَل ڳیا. ایں دوران میں خفیہ طور تے اون٘دے ذاتی حالات بارےجاݨکاری گھدی پکا پک تھی ڳیا او اپݨے علاقے وچ کھرا سچا، نیک، تے صوم صلوۃ دا پابند اے تے اوندے گھریلو حالات وی اُنویں ہِن جیویں جو اُوں ݙسائےہَن.
اُوں ویلھےکُڄھ وَخت سانگےصوبائی حکومت نےڈپٹی کمشنریں کوں اے اختیار ݙتیا ہویا ہا کہیں سرکاری بےآباد اَٹھ مربع بھوئیں کوں اینجھےخاہش مند کوں دِرگھی میعاذ کیتے ݙتا ون٘ڄ سَڳیندا ہا جیرھا جو اُون٘کوں آباد کرݨ سانگے تیار ھووےہا، مَیں اپݨےمال افسر(پَٹواڑی)غلام عباس کوں سَݙ کراہیں آکھیا جو کہیں چن٘ڳی جاہ اَٹھ مربع دی ڳول کرجینکوں تِکھاجی نال واہی بیجی کیتی ون٘ج سَڳیجے تے مشکل وی نہ پووے. پَٹواڑی ایں سمجھیا جو راہاوݨ سانگے بھوئیں میں اپݨےکہیں رشتےدار کوں ݙیوݨ چاہن٘داں. تھوڑےݙینہہ گزرݨ بعد پَکی سڑک دےنال بھوئیں لَبھ گھدی تےرحمت الہیٰ دےنان٘ویں الاٹمنٹ ضروری کاروائی کرتےسارےکاغذات میݙےحوالےکرݙتے. ݙوجھی واری جئیں ویلھے رحمت الہٰی آیا میں اے نذرانہ اون٘دی خدمت وچ پیش کر تےمال افسر دےحوالے کرݙتا جو قبضہ وغیرہ ݙیواوݨ تےباقی ساری ضروریات پوری کرݨ وچ اوندی مدد کیتی ون٘ڄے.تقریباً ٩ سال بعد میں کراچی وچ فیلڈ مارشل جنرل ایوب نال کم کار وچ رُدھا پیاں ہم، ایوان صدر وچ میݙےناں دا ہک رجسٹرڈ خط موصول تھیا(اوں ویلھے پاکستان دا صدرمقام کراچی ہا). اےماسٹر رحمت الہٰی دی طرفوں ہا جو اوں بھوئیں دی کَھٹی وَٹی نال ترناہیں دھیریں دی رخصتی وی کرگھدی او اپݨےگھریں تِڑیں خوش و خرم آباد ہن.تےمیں اپݨی ذال سمیت حج وی کرگھدے. اپݨےگزارےتےرہائش سانگے تھوڑی جیہیں بھوئیں مُل نال گھن گھدی اے، تےایندےعلاوہ ہک کچا کوٹھا وی بݨا گھدے.. ایں خوشحالی وچ میکوں انہاں اَٹھ مربعیں دی طَلب کائنی، اِیں سانگےالاٹمنٹ دےسمورے کاغذات خط نال بھیج چھوڑیم تاں جو کہیں ضرورت مند اپݨی ضرورت پوری کرسڳے. اےخط پڑھݨ نال میڈےاکھیں ہنجوں دی فیکٹری نال اݨ ڳݨت وپار کیتا.اڄݨ سوچیں وان٘د نہ ݙتی ہئی صدر پاکستان میݙے کمرےکئی ڳالھ کرݨ سانگےآئےتےآکھیوس"کس سوچ میں گم ہو"میݙی حالت کوں ݙیکھ کراہیں... میں اونکوں رحمت الہٰی دا سارا واقعہ سݨا ݙتا، تےاو وݙےحیران تھئےکجھ لحظہ چُپ دی چُپ رہی، ول اچݨ چیت آکھیس تئیں ٻہوں وَݙا نیکی دا کم کیتے.میں گورنر کوں لاہور ٹیلیفون کرݙین٘داں اے ساری بھوئیں ہݨ تیݙےنان٘ویں کرݙیوے.مَیں ڈھیرساری عاجزی نال اپیل کیتی جو میں ایں انعام دا حقدار کائنی، اے سُݨ تےصدرپاکستان آکھیا تیکوں زرعی اراضی گھنݨ سانگےکوئ دلچسپی کائنی؟ "جی نہیں سر"میں التجا کیتی، آخر وچ صرف ٢گز بھوئیں قبر کیتےکم اندی اے، او کتھاہیں نہ کتھاہیں کہیں طریقےنال مل ویندی اے.... ایں واقعےدےسارےکردار اڄ ساݙے درمیان کائنی، لیکن جھنگ دےہک پرائمری استاد رحمت الٰہی دا کردار ساݙے سانگےہک سوجھلے دےوانگ اے، ایں دَڳ تے ٹُر تے حیاتی دا پندھ بُھر سڳدوں...