واحد بخش شیراز

اصل ناں      واحد بخش

قلمی ناں      واحد بخش شیرازؔ   

جمن          1978 ء   

تعلیم         ایف اے

پیشہ          سرکاری ملازمت  

فون نمبر       03437134550

جاہ پتہ        چورکن ڈاکخانہ نتکانی تحصیل تونسہ شریف (ڈیرہ غازیخان)

شعری مجموعہ ’’ست رنگی پینگھ‘‘دے خالق واحد بخش شیرازؔ دا تعلق تحصیل تونسہ دی بزدار فیملی نال ہے،ایں توں پہلے آپ دا شعری مجموعہ ’’پیلھوں ‘‘ وی 2006ء اچ چھپ چکے ۔واحد بخش شیراز غزل دے مزاج آشنا یعنی غزل گو شاعر ہن اوہ وڈے ہنر تے سلیقہ مندی نال الفاظ کوں ترتیب ڈی کے رواں بحراں وچ غزل لکھدن تے غزل اچ شاعرانہ گالھ کریندن۔آپ دی غزل اچ جدت تے روایت دا حسین امتزاج ہے۔واحد بخش شیراز غزل اچ جتھاں عشق و محبت دی گالھ کریندن اُتھاں معاشرتی مسائل دا اظہار، سماج دشمن عناصر تے بھوئیں واس خداواں کوں وی اپنی قلم دا نشانہ بنیندن تے آہدن۔

ساری دنیاں دے رب کوں تاں میں جانداں

تیڈی وستی  دا  رب میں  نمہی  جاندا

غزل

سوچ تانگھیں دی سولی چڑھی ہے اوئیں

ساڈے جیون دی اوکھی گھڑی ہے اوئیں

           روز پیریں دیوچ نَیل صدمات دے

           ڈ وجھا حالات دی ہتھکڑی ہے اوئیں

خون جتناں تھیا میڈے جذبات دا          

اوندی مہندی کوں رنگت چڑھی ہے اوئیں          

         حرف کاغذ تے لکھئے ہوئے مِٹ گئے

         گالھ دل تے لکھی ہوئی کھڑی ہے اوئیں

توں تاں شیرازؔ ویندا تھئیں چھوڑ کے          

ساڈے ہنجھوں دی وسدی جھڑی ہے اوئیں