ندیم سمیجو

اصل ناں    اللہ ڈٖتہ

قلمی ناں    ندیم ؔسمیجو

جٖمنْ        1955ء

جاہ پتہ      امین آباد تحصیل لیاقت پور ضلع رحیم یار خاں

ندیمؔ سمیجو (صدر سانجھ سرائیکی)ضلع رحیم یار خاں دے مہاندرے سرائیکی شاعر ہن۔شعری اصناف اچوں نظم تے غزل انہاندیاں پسندیدہ اصناف ہن۔آپ دا نمونہ کلام حاضر ہے!

غزل

بے دردیں کوں درد سنْاوے دل وی کتنا پاگٖل ہے

اسمانیں کوں ٹاکیاں لاوے دل وی کتنا پاگٖل ہے

ڈٖکھ نگری وچ رہندا ہے پر سولیں توں بے بھلما تھی

سوچیں دے ست ماڑ بنْاوے دل وی کتنا پاگٖل ہے

جو بے خینسا تھی سم ویندے ساکوں اوں بیدرد دے کانْ

ساری ساری رات جگٖاوے دل وی کتنا پاگٖل ہے

آپ سہاپ سہاوے کملا، آپ مناوے بے وس تھی

زور آور نال زور ازماوے دل وی کتنا پاگٖل ہے

ہجر اندھارا مکنْے اوڑک تھیسے سوجھل وصل ندیمؔ

روز دا میکوں بھیں بھیں لاوے دل وی کتنا پاگٖل ہے

؎مونجٖھ وکھوہے خوف کھپارے ہن ساڈٖی جیداد

ساڈٖی ساری کھٹی سنجی وپرے تے وسواس