ندیم بخاری

اصل ناں      ندیم عباس شاہ

قلمی ناں      ندیم بخاری

جمن           1971ء  

تعلیم           بی اے

پیشہ            ملازمت

جاہ پتہ          (میانوالی)

غزل

سینگیاں نال کھلوون والے اساں ہیں

اپنے حال تے روون والے اساں ہیں

کھیر دی ہر تاثیر کوں ڈاڈھا بجھدے ہیں

منجھیں ، گائیں ڈوھوون والے اساں ہیں

نکی جھئیں ہک کھل دے نال منیندے ہیں

ہر گل تے رُس پوون والے اساں ہیں

ہجرت والی رات دا ساڈے کولوں پچھ

وسدے گھر کوں ڈھوون والے اساں ہیں

ہنج دے پانی نال رلا کے ہاسے کوں

ڈکھ دی تختی دھوون والے اساں ہیں

___________________

سڑدے کاغذ ڈیکھاں کیویں

بھا تے ہتھ میں سیکاں کیویں

شیشہ میکوں تُر تُر ڈیکھے

میں شیشے کوں ڈیکھاں کیویں

غیر تاں غیر ندیم ؔ بخاری

اپنے بنسن ٹیکاں کیویں

٭٭٭