نبیذ

نبیذ اوہ مشروب اے جیندے وچ کھجوراں سٹے ونجن جس نال پاݨی مٹھا تھی ونجے تے سکون آور ہووے. نبیذ تازہ یا خشک پھلاں توں تیار کیتا ونجݨ والا جوس ہے. جوس وی نبیذ ہی دی ہک قسم ہے۔ نبیذ عمومًا کھجور دے شربت (زلال، نتھرا ہویا شربت) کوں آہدے ہن کہ رات کوں کشمش یا کھجوراں پاݨی وچ بھگو ݙتے ویندے ہن. صبح کوں اوہ پاݨی نتار کے پیتا ویندا ہے، اونکوں نبیذ آہدے ہن۔ ایہ بہت ہی مقوی تے زود ہضم ہوندا ہے. ایہ حلال ہے.

بݨاوݨ تے استعمال کرݨ دا طریقہ

کہیں وی خشک پھل (منقی یا چھوہارے) کوں پاݨی وش سٹ ݙتا ویندے، جیہڑے ویلے اوہ نرم تھی ویندے تاں پھل کوں ہتھاں نال مسل کے کہیں کپڑے نال ایندا پاݨی نچوڑ گھدا ویندے تاکہ پھل دی پھوڳ الگ تھی ونجے. ایں پھل دے اثر والا نچڑا ہویا پاݨی نبیذ سݙیندا ہے. ایہ ذائقہ دار تے مقوی ہوندا ہے۔

درست حالت وچ جیہڑی نبیذ ہوندی ہے اونکوں گرمیاں وچ ہک ݙینہ تے سردیاں وچ ترے ݙینہ تک پویج سڳدے کیونکہ زیادہ دیر تک پیا رہوݨ دی وجہ نال ایندے وچ نشہ آوݨ دا اندیشہ ہے۔ چنانچہ سیدہ عائشہ صدیقہ دا بیان ہے کہ ہر مشروب پویج سڳدے مگر نشے وچ نہ آوے۔ عبد اللہ ابن عباس توں ہک آدمی نے پچھا: میں مٹھی نبیذ نوش کریندا ہاں تاں پیوݨ دے بعد میݙے پیٹ وچ گُڑ گُڑ تھیندی ہے، ابن عباس نے فرمایا کہ ایسی نبیذ مت نوش کرو اگرچہ اوہ شہد توں وی زیادہ مٹھی ہووے۔ ایہا پراݨی ہووے تاں نشے والی بݨ ویندی ہے.