میݙے بابا

میڈے بابا سید عارف حسین شاہ شہید دے حضور

شاباس شاباس جلدی کرو عید نماز تے ونجڑا ہے جلدی جلدی تیاری کرو تے ہک گال دا خیال رکھئے سارے اکٹھے ویسوں ہک وڈی حویلی دا سربراہ او حویلی جیری پوری وسوں وچ مشہور ہئ تے ایں حویلی دی مشوری دی وجہ ایں حویلی وچ راہونڑ آلے ہک خاندان دے بندے ہن جیرے سونا شاہ تے چن شاہ ڈو بھراواں دا باغ ھئ جیرا پھلدیں پھُلدیں 250 افراد تک پہنچ گیا ہئ سونا شاہ تے چن شاہ اپنڑی اپنڑی حیاتی گزار کے اپنڑے اپنڑے مکان وچ سکون دی نیندر سُتے پے ہن او ڈوہیں بالکل ان پڑھ سادا تے مزدور ہن بھل شعور اونہہ دور وچ وی اُناں کوں اتنا ہا جو اُناں اپنڑے بالاں کوں سخت مفلسی دی حالت وچ وی پڑھایا تے ہُنڑ جیرا ایں کُنبے دا سربراہ ہئ او سونے شاہ دا وڈا وڈا پتر ڈویزنل اکاونٹ آفیسر سید عارف حسین شاہ ہئ پورےکُنبے دا ڈُکھ سُکھ شادی غمی اُندے سر تے ہئ وقت دا بے نکیل شتر اپنڑی مستی وچ مست بہوں تیزی نال بجھدا ویندا ہئ ہک خوشحال گھرانہ اپنڑے وسیب وچ پورے وجود نال جیندا پیا ہئ ایں ہک گھر وچ ہر مضمون دا ایم اے سویر چُلہے تے ملدا ہئ فٹ بالر ، کرکٹر تے ہر کھیڈ دا کھیڈاری ایں خاندان وچ موجود ہا وقت بدلنڑ لگ گئے حالات خراب تھیونڑ لگ گئے پوری وسوں کوں بھا لگ گئ فرقہ واریت دی ڈینڑ چُلھ چُلھ دی سینڑ بنڑ گئ شاہ صاحب تساں خیال کیتا کرو تساں ہک گزٹیڈ آفیسر ہیوے تے ول آندے وی چنگ چی تے ہیوے یا وت سائیکل تے اپنڑاں خیال کیتا کرو

شاہ صاحب فائل تے سائن کریندیں ہوئیں کھل کے آکھیا 

،، یار ساڈی کہیں نال کیری دشمنی ہے یا اساں کوئ کہیں کوں کیا تکلیف ڈتی ہے جو کوئ ساکوں مریسی،، شاہ صاحب ھنڑ حالات او نی تساں مہربانی کرو سید عارف حسین شاہ فائل کو ہتھ نال ہک پاسے کیتے تےاپنڑے کولیگ نال مخاطب تھین یار شبیر اچھا چلو تو آدھیں احتیاط کر کیری شے احتیاط کراں سویر دفتر آونڑاں ہے 8 وجے ولا واپس ونجنڑاں اے شہر کیویں چھوڑ سگدے سے ایں پروں کوٹلہ سیدان آلے قبر غستان وچ ساڈے ست نسلاں دے قبراں ہن اساں اتنے ایں جاہ دے ہیں جو اساں کیتھیں ونجو وی سہی تے اے مٹی وی ساکوں نہ نکلنڑ ڈیسی ساڈی اپنڑی وسوں ساڈا اپنڑاں وسیب اساں کیتھاں چھوڑ سگدے سے ساڈی سنجانڑ ھے ایتھاں غلام شبیر جیرے لوک اپنڑی وسوں چھوڑ ونجن اُنہاں دی سُنجانڑ ختم تھی ویندی ہے میں ایں مٹی تے مرنڑ کہیں ان سونہیں جاہ تے جیونڑ کول زیادہ بہتر سمجھینداں یار میڈا گھر ہے بھرا ہن رشتہ دار ہن ہر شے میڈی ایں مٹی نال جُڑی ہوئ ہے غلام شبیر وی روز کہیں نہ کہیں بہانے اے گال کر ہاہندہ ہئ تے سید عارف شاہ وی اپنڑی سچائ تے سادگی تے اڑا رہے

مگر ہک سویر ڈو ہزار اٹھ دی ہک ایسی سویر جہیں سیداں آلی حویلی دی شام.کر ڈتی ہے سویر دفتر ویندیں ہوئیں پیر زکوڑیاں آلے قبرغستان دے سامنڑے او دہشت گردی دا نشانہ تھی گین چنگ چی تے ویندے پئے ہن چنگ چی آلا ڈسیندے جو مرنڑ کن پہلے اُناں دہشت گرداں نال شاہ صاحب دا بس اتنا مکالمہ تھئے ،، میکوں مارو مگر میکوں اے ڈسو میڈا جُرم کیا ہے ،، اج جیرے ویلے میڈا بھرا سارے بھراواں تے پتریراں (سوترراں) کوں سویرے اے آدھا ودا ہئ جلدی کرو عید دی نماز دی تیاری کرو سارے رلے ویسوں اونہہ ویلے میں اندر بابا جی آلی کھٹ تے بہہ کے روندا بیٹھا ہم.