میاں محمد بخش نوروز
میاں محمد بخش نوروز مبارک پور دی وستی ٹٻی ݙاتہ دی ہک معروف وستی رکراݨی دے وچ ڄمیے۔آپ دے ڄمݨ دے کجھ عرصہ بعد ہی آپ دے والد فوت تھی ڳئے۔ آپ کوں وستی دے مولوی پیر بخش ہوراں پالا۔ وݙے تھئے تاں آپ کوں لکھݨ پڑھݨ کیتے موضع شجاد پور دے ہک بزرگ قادر بخش قریشی کول جلال پور پیروالا بھیڄ ݙتا ڳیا۔ جلال پور پیروالا وچ اوں ویلے دے بزرگ شاعر حافظ فتح محمد نال وی تھئی۔
نوروز کوں حضرت خواجہ فریدؒ دی صحبت وچ رہݨ تے ٻہݨ دا شرف وی حاصل تھیا۔ آپ فقیرانہ طبیعت دا مالک ہن۔ دنیا داری توں ہمیشہ پرے راہندے ہن۔
نوروزچرونجھہ سال دی عمر وچ درد قولنج پاروں جلال پور پیر والا وچ فوت تھیئے تے وصیت دے مطابق انھاں کوں وستی رکراݨی وچ دفن کیتا ڳیا۔
میاں محمد بخش نوروز سرائیکی دے ڳݨیے چُݨے مہاندرے شعراء وچوں ہک ہن۔ نوروز عہد فریدی دے او پہلے نمائندہ شاعر ہن، جنھاں تصوف تون نکل تے خالص رومانوی تے عشقیہ شاعری کوں اختیار کیتا۔ نوروز دی شاعری داخلیت تے خارجیت دے وݙے سوہݨے ملاپ دا نمونہ ہے۔ انھاں دے اظہار دا رنگ سبھ شاعراں کنوں وکھرا ہے۔ نوروز ݙوہڑے دی صنف دا ٻہوں وݙا شاعر ہے۔
کتاباں لکھو
- محمد بخش نوروز دے قصہ لیلیٰ مجنوں
- ݙوہڑیاں دے ݙو مجموعے
- کافیاں دے ݙو مجموعے " شعلۂ دل سوز" دے ناں نال شائع تھئے۔ ایں مجموعہ کلام کوں اوں وقت دے مہاندرے شاعر برخوردار وفا مرتب کیتا ہائی۔
نوروز حضرت خواجہ صاحب دی وفات دے بعد کافی عرصہ تائیں جیندے ریہے۔
سرائیکی زبان دے شعری ادب دی تاریخ وچ نوروز ہک دبستان دی حیثیت رکھدے۔ صدیاں تے کھِنڈی تصوف دی روایت توں ہٹ تے او پہلا شاعر ہے جیں آپݨاں ہک نویکلا رستہ بݨائے۔ انھاں دے کلام وچ ھنی تے فکری انفرادیت ہے۔ نوروز سرائیکی زبان دی جدید شاعری دا ایرا ٻدھے تے تصوف دی روایت کوں چھوڑ تے آپݨے کیتے فن دیاں نویاں راہیں ڳولیاں ہن۔ عہد فرید دا ایہ شاعر ایں کیتے ہمیشہ یاد رکھیا ویسی۔