میانوالی ونجݨ دا پروگرام

دوستو ! اڄ میانوالی ونڄݨ دا پروگرام ہے ،میانوالی مینوں جان تھوں پیاری ہے تے اس دی مٹی دی خشبو میں ہر ویلے اپݨے نال محسوس کرینداں ۔اس گرمی اچ تھل دیاں ٹھڈیاں مٹھیاں راتاں کیویں بھلائیاں ونڄ سڳدیاں ہن۔ظفر پتریر ،مینر گھݨجیرا ،ضیااللہ سلماݨی خیل تے ڈاکٹر عالم شیر نال مل تے مسعود کومل دی مٹھی تے سریلی آواز اچ دادن دے ٹٻیاں تے رات کوں خواجہ غلام فرید دیاں کافیاں تے لوک ڳیت سݨݨ دی تے گھمراں پاوݨ دی ہک اپݨی چس ہے تے اے چس کیویں نہ چساں۔اس بارے تفصیلات واپس آ کے تہاݙے نال شیئر کریساں۔ فی الحال پروفیسر مظفر ملک دے بارے ڄہڑیاں ڳلاں ادھوریاں رہ ڳئیاں ہن انہاں کوں مکمل کر گھناں۔

عرض کیتا ملک صاحب تہاݙا ماݨ نہ ترٹسی تے اس فورم دا ممبر بݨ کے خوشی تھیسی ،نال ڄہڑی ذمہ داری لیسو نھباوݨ دی وی پوری کوشت کریساں۔ملک صاحب وݙے کوش تھئے تے چا پی کے ونڄݨ دی اجازت ڳدی ۔

کجھ ݙیاں بعد ملک مظفر دا فون آیا ڄو فلاں ڈینہہ میانوالی سٹیزن فورم دا ماڈل ٹاؤن ای بلاک اچ اجلاس ہے تے تساں اس دے وچ شریک تھیوݨاں ہے۔اجلاس اچ ونڄ کے ٻہوں خوشی تھئی کیوں ڄو میانوالی دے سارے مہاندرے لوک اتھاں موجود ہن۔اجلاس اچ شیر بہادر چغتائی،ڈاکٹر اجمل نیازی،ڈاکٹر پروفیسر اشرف خان نیازی( عمران خان دے پتریروں پتریر) امیر خان نیازی( کالم نگار) تے ناچیز کوں ڳل بات دی دعوت ݙتی ڳئی۔ اجلاس اچ طے تھیا ڄو ہر عید تے میانوالی اچ عید ملݨ پارٹی کیتی ونڄیں کیوں ڄو اس موقع تے ہر کوئی میانوالی ہوندا ہے ۔اس پارٹی دے وچ میانوالی دے سارے سیاستدانوں کوں دعوت ݙتی ونڄین تاں ڄو میانوالی دی سماجی ،معاشی تےثقافتی ترقی بارے ڳل بات کیتی ونڄ سڳے۔اجلاس اچ اے وی طے تھیا ڄو میانوالی سٹیزن فورم دی تنظیم کاری کیتی ونڄے تے میانوالی دے ہر قصبے اچ اس دے یونٹ قاءم کیتے ونڄن۔این حوالے نال کڄھ مطالبات رکھے ونڄن۔انہاں مطالبات اچ وݙے مطالبے میانوالی کوں معدنیات تے پن بجلی دی رائلٹی دا حصہ،کساناں کوں زرعی مقاصد آستے مفت بجلی،مہاڑ دے علاقے کوں نہری پاݨی دی فراہمی،تھل اچ آبیانے دی وصولی دا خاتمہ،کیڈٹ کالج دا قیام، ٹربائن تے ٹیوب ویلاں تے فلیٹ ریٹ دا خاتمہ ، زراعت تے کساناں دی ترقی کیتے جامع پالیسی دا نفاذ ،کالاباغ تھوں نکلݨ آلے لوہے واسطے سٹیل ملک دا قیام وغیرہ شامل ہن۔ میانوالی سٹیزن فورم کوں مضبوط بناوݨ کیتے، اس دا منشور تے پیغام " ندائے میانوالی اچ چھاپیا ڳیا تے میانوالی دے ہر قصبے اچ تقسیم کیتا ڳیا۔اس دے نال نال پروفیسر مظفر ملک تے ناچیز نے میانوالی دے ہر قصبہ،گاؤں تے علاقے دا دورہ کر کے اتھاں اس فورم دے یونٹ قائم کیتے ۔اس حوالے نال میانوالی دے صحافی طاہر ساقی دیاں خدمات کوں نئیں بھلایا انڄ سڳدا۔حکیم اسلم خان،کلیم اللہ ملک ،روشن ضمیر ملک،رحمت اللہ خان ہزارے خیل تے ٻہوں ساریاں دوستاں ایں حوالے نال نمایاں کردار ادا کیتا تے ہر ڄھا توں شاعر،ادیب،لکھاری،صحافی،دانشور تے سیاسی کارکن اس فورم تے اکٹھے کرڳدے ڳئے۔انہاں لکھاریاں اپݨیاں لھکتاں "ندائے میانوالی اچ بھیڄِݨا شروع کر ݙتیاں جنہاں کوں چھاپ کے ہر جھاہ تے ونݙیا ویندا ہائی۔اس دا نتیڄہ اے نکلیا ڄو میانوالی دے مسائل تے محرومیاں اڄاڳر تھیوݨا شروع کر ݙتا۔ہر قصبے اچ ہر مہینے فورم دا اجلاس تھیوݨا شروع تھی ڳیا تے اتھے میانوالی دے مسائل با رے ڳل بات تھیوݨا شروع تھی ڳئی۔ایں حوالے ںال لاہور اچ وی اجلاس تھیوݨا شروع تھی ڳئے ،علاقے دے سیاستدان متوجہ تھئے تے انہاں وی اس دے اجلاساں آوݨا شروع کر ݙتا۔

اس زمانے اچ تحریک انصاف چھوٹی پارٹی سمجھی ویندی ہائی تے لوک اس پاسے ایݙا دھیاں نن ݙیندے البتہ عمران خان کوں لوک چنگا سمجھیندے ہن۔میانوالی اچ تحریک انصاف نال کوئی وی نمایاں بندہ کونا ہائی تے نہ عمران خان کوں اتھاں سیاسی اہمیت حاصل ہئی۔میانوالی سٹیزن فورم دے ہک اجلاس اچ پروفیسر مظفر ملک میݙے تے زرو ݙتاڄو عمران خان کوں میانوالی اچ استقبالیہ ݙتا ونڄییں تاں ڄو انہاں کوں اتھاں سیاست اچ اڳے گھن آواں تے نال میانوالی دے مسائل انہاں دے سامݨے رکھاں۔میں ایں حوالے نال جناب عمران خان نال ڳل کیتی تے سارا مدعا بیان کیتوم۔ (او انہں ݙیہاں اچ زمان پارک لاہور توں بنی گالا ،اسلام آباد شفٹ تھی چکے ہن کیوں ڄو محترمہ جمائمہ خان کوں لاہور اچ راہوݨ تے ٻہوں سارے تحفظات ہن) ۔ عمران خان کوں وݙی خوشی تھئی تے آکھیا ڄو سیف اللہ خان نال مل کے پروگرام کوں فائنل کرو۔ سیف اللہ خان تے میں اس پروگرام کوں حتمی شکل ݙتی لیکن ایں دوراں میݙے والد محترم وی فوت تھی ڳئے۔

عمران خان دے اعزاز اچ میانوالی پریس کلب دے حال اچ استقبالیہ دے سارے انتظا مات جناب کلیم اللہ ملک مرحوم تے طاہر ساقی دے ذمے لائے ڳئے ہن کیوں ڄو میں والد صاحب دی فوتگی دی وجہ نال ٹائم نم ݙے سڳدا ۔ اس زمانے اچ جناب کرنل حسن خان تحریک انصاف میانوالی دے صدر ہن تے میݙے انتہائی محترم دوست ڈاکٹر شفقت اللہ خان نیازی سرگودھا ڈویژنل دے صدر ہن۔ ۔۔۔۔۔۔۔۔۔۔ دوستو ! ڳل بات جاری ہے ،باقی وت