مہجور بخاری

اصل ناں    اللہ وسایا

قلمی ناں    مہجورؔ بخاری

جٖمنْ        1940ء

جاہ پتہ      شہر سلطان ضلع مظفر گڑھ

نِکّی جھئیں گٖل توں رسدیں ڈھولا تیڈٖی کمال ئِ(عطاء اللہ نیازی دا ابتدائی گٖاونْاں )دے خالق مہجورؔ بخاری جنہاں کوں ثانیِ جانبازؔ دا خطاب ڈتا گٖئے۔آپدا شمار سرائیکی دے نمائندہ شاعراں وچ تھیندے۔

غزل

نہ میں کہیں دے گھر ٹر گٖیاں نہ میڈٖو کوئی آیا ہے

میں تاں اپنْی خواہش دا خود آپ جنازہ چایا ہے

چاندنْی رات ہے چنڈ گُٹھ روشن اتھ کئی چور چکار نی ول

جئیں توں ڈٖر لگدا پئی ایہ تاں میڈٖا اپنْاں سایہ ہے

میں تاں تنہا ہاں دھرتی تے تنہائی اے راز ڈٖسا

ایں وستی وچ کئی نئیں میڈٖا ، ول کَیں در کھڑکایا ہے

کیندے قسمیں تے وِس پوواں کَیں تے پت اعتبار کراں

اتھ کئی دم ہمدم نئیں میڈٖا ،سارا شہر پرایا ہے

کچے دھاگٖے ترٹدے رہندن کیوں مہجورؔ ہیں وپریں وچ

کاغذ دی بٖیڑی ڈٖس اجٖ تئیں کیکوں پار پچایا ہے