مَولود شریف منظوم

مَولود شریف (سرائیکی)(منظوم نعت شریف)

تخلیق: ابنِ کلیم احسن نظامی

مَولود شریف

مِٹھا مدنی ہِے شاناں وَالا سئیں

ربّ بخشِن رُتبے اعلیٰ سئیں

اِے کون و مکاں دے والی ہِن

وِچ نبیاں صاحب عالی ہِن

اِیندے دَر دے سب سوالی ہِن

تِھیا عاشِق رَبّ تعالیٰ سئیں

مِٹھا مدنی ہِے شاناں والا سئیں

اِیندے مونڈھے کملی کالی ہے

اِیہا کملی رحمت والی ہے

مِلی عظمت ذوالجلالی ہے

آیا پردے کَڄݨ والا سئیں

مِٹھا مدنی ہے شاناں وَالا سئیں

ایہ اللہ دے دِلدار بݨے،

سَب نبیاں دے سردار بݨے

کُل دُنیا دے مختار بَݨے

ہے نعمتاں وَن٘ڈݨ والا سئیں

مِٹھا مدنی ہِے شاناں والا سئیں

ایہ نعت احسنؔ منظور کرو!

میݙا سِینہ چا پُر نُور کرو

سَݙ روضے تے مسرُور کرو

ڳَل پریت دی ہِے پئی مالا سئیں

مِٹھا مدنی ہِے شاناں والا سئیں

رَبّ بخشِن رُتبے اعلیٰ سئیں

(اقتباس از: کتاب : سَرائیکی منظوم  "تَریخ نَامہ" (عہدِ رِسالت ﷺ تُوں مظفر خان شہید تئیں)۔ از (مصنف، نظماں دِی تخلیق نقشے وغیرہ): اِبنِ کلیم احسن نظامی، (سرائیکی و اُردو شاعر، خطاط ہفت قلم و موجدِ خطِ رعنا، اَدیب و سکالر)۔ چھپائی: کلیم آرٹ پریس وحید پلازہ حسن پروانہ روڈ، ملتان۔ تعاون: دبستان فروغِ خطاطی (رجسٹرڈ) ملتان۔ اشاعت: جولائی ٢٠١٤ء۔ تقسیم کار: کلیم پبلشرز، وحید پلازہ حسن پروانہ روڈ، ملتان۔ 7005399-0331)۔

MubasherKaleem (talk) 16:29, 11 September 2018 (UTC)