منظور خاکی
اصل ناں منظور حسین
قلمی ناں منظور خاکیؔ
جٖمنْ 1941ء
منظور خاکی دا تعلق شاعراں دے شہر احمد پور شرقیہ نال ہے جیڑھا ہر دور وچ سرائیکی شاعراں دا گڑھ رہے۔خاکی صاحب ہک حساس دل شاعر ہے۔نمونہ کلام ملاحظہ کرو!
غزل
لکھوہے انتظار دیوچ دل بے قرار آ ونجٖ
آ ونجٖ نہ دیر لا اے ہاں دے ٹھار آونجٖ
کر چا توں مہر بانی کر چا نظر کرم دی
روندا ہے ہجر دیوچ دل زار و زار آ ونجٖ
دردیں دے نال اجٖکل تھیندے میڈٖا گزارا
ہک پل نی چین آندا بنْ کے قرار آ ونجٖ
ہے شوق دا تقاضا رجٖ رجٖ کے تیکوں ڈٖیکھاں
رُخ توں ہٹاتے پردہ اے پردہ دار آ ونجٖ
تیڈٖے بغیر دل دا ویران تھی گٖئے گلشن
ہُنْ تاں خزاں دیوچ توں بنْ تے بہار آ ونجٖ
آونْ دا کر تے وعدہ کیوں بھُل گٖیا ہیں خاکیؔ
ڈٖینہ رات دل کوں تیڈٖا ہے انتظار آ ونجٖ