ملھِݨ
ملھݨ
ایہ کھیݙ جڳ مشہور کھیݙ ہے. ایہ کھیݙ ہربندہ نی کھیݙ سڳدا۔ اینکوں صرف پہلوان کھیݙدن۔ ایندے واسطے سبھ توں پہلے ہوکا ݙتا ویندے جوفلاں وار کوں فلاں جاہ تے فلاں ویلھے ملھݨ تھیسی. تے ایندے وچ فلاں فلاں پہلوان ہوسن.
وار تے ویلھا آنوݨ تے لوکی اوں جاہ کٹھے تھی ویندے ھن. اجکل تاں ایندے کیتے باقاعدہ ٹکٹ لڳدی ھ. ایں کھیݙ کوں لوک وݙے شوق نال ݙیہدن. موقع تے تماش بیناں دا رش لڳ ویندے، پہلوان آویندن تے بین نغارے آلے وی سݙئیے ویندن. ہک پراݨے بندے کوں جج، ریفری یا وݙابݨا ݙتا ویندے جیہڑا پہلواناں دے فیصلے کریندے تے ہوکا لا تے پہلواناں کوں سݙیندے. ہوکا کجھ ایں طرحاں دا ہوندے جو فلاں پہلوان فلاں علاقے دا توں تیار تھی ونج تے فلاں پہلوان فلاں علاقے دا توں وی تیار تھی ونج. ول او پہلوان چوتے شوتے بدھ تے میدان وچ آ ویندن تے پورے ملھݨ گراؤنڈ دا چکر لا تے گراؤنڈ دے ادھ وچ آ تے نعرہ لایندن یا علی مدد تے اتھاؤں مٹی چاتے اپڑیں بت تے ملیندن. ایں گراؤنڈ کوں پہلے کہی نال لپے مار تے مٹی پٹی ویندی اے تے اے مٹی کولی کیتی ویندی ھ تاں جو ݙلھ پہلواناں کوں نہ لڳن اتے انہاں کئی پھٹ شٹ یا جھریٹ نہ لڳ ونجے. ایندے باد پہلوان اشارہ ملݨ تے ہک ٻئے کوں سلام کرتے چمبا پاتے ملھݨ شروع کریندن تے ہک ٻئے کوں داء مار تے ڈھانوݨ دی کوشت کریندن. تے ہک ٻئے دی زمین کوں کنڈھ لانوݨ دی کوشد کریندن. جݙاں کئی ہک پہلوان ݙوجھے پہلوان دی کنڈھ لا گھندے تے او اٹھی تے پہلے نعرہ لیندے یا علی مدد تے ݙوجھا پہلوان واپس ویندے پیا تے جیتݨ آلا پہلوان ہر بندے کول ٹر تے ویندے تے داد دے نال انعام گھندے. جݙاں لڑدیں وی کہیں کوں کہیں پہلوان دا داء بھاہ ونجے تاں او ونج تے پیسے گھول تے ریفری کوں ݙے آندے جیہڑا جو بعد وچ اوں پہلوان کوں مل ویندے. چھیکڑی مقابلہ وݙے پہلواناں دا رکھیا ویندے. اے کھیݙ چھیکڑی پہلوان تک ایویں چلدی ہے پئی. افسوس اے ھ جو اجکل ایں کھیݙ دا رواج مکدا ویندے جیہڑی جو صحت کیتے وی چنگی ہئی تے لوکاں دی تفریح سانگے وی چنگی ہئی