ملکی نظام

پورے ملک دا نظام درھم برھم ھے عدالت صرف تحریک انصاف تیں مسلم لیگ نون واسطے بنڑی ھے، ھر ٹی وی چینل تیں صرف انھیں ڈو پارٹیں دی گال سُنڑ سُنڑ کے عوام زھنی مریض بنڑ چُکی ھے،دھشت گرد آپڑیں مقصد ءچ کامیاب تھی کے بیگناہ انسانیں کوں نشانہ بنڑیندے پئین، محافظ ایں گال تیں خوش تھیندے بیٹھن کہ شکر ھے تھوڑا نقصان تھئے صرف اٹھ ڈاہ بندے مر گئین، میڈیا وی انھائیں دے نقش ءقدم تیں چلدیں ھوئیں محافظیں دی تعریف ءچ زمین آسمان ھک کریندا پئے، میں سوچینداں کہ صرف ڈاہ بندے مرنڑ نال کیا نقصان تھیندے، کڈھائیں اے وی سوچے وے کہ ھک بندے نال کتنے بندے منسلک ھوندن، ھک بندے دے بھرا بھینڑیں، اماں، ابا، چاچے، مامے، کیا اوں ھک بندے دے مرنڑ نال انھیں بندیں دی ذات تیں زندگی تیں اثر نیں پُوندا، کہیں یتیم کنیں پُچھ ڈیکھو جڈاں ابے دا سایہ سر توں، لیھ ونجے کیا تھیندے، کہیں بیوہ کنوں پُچھ ڈیکھو سر دا تاج اُجڑ ونجے زمانے دے کیا رنگ ھوندن، کہیں بھینڑ کنوں پُچھ ڈیکھو، بھرا جڈاں مردئن، زندگی کیویں لگدی ھے، مگر اے گالھیں اوں بندے کوں پتہ لگدئن جیندا ظرف ضمیر غیرت زندہ ھووے، جڈاں مُلک دے حاکم ھک ڈُوجھے کوں چور تیں بد دیانت ثابت کرنڑ تیں زور لئ ودے ھوون، صرف زور وی ،نہ، ،ھوون وی بد دیانت تیں لٹیرے غاصب، جڈاں محافظ ھر چور تیں رھزن دے چپڑاسی ھوون،جڈاں عوام بے حس تیں گُونگی بنڑ کے بے شرمی دی چادر پاء کے انھیں کوں مسیحا سمجھنڑ لگ ونجے.

جڈاں صحافی چند ٹکیں دی خاطر قلم ویچ کے دلالی شروع کر ڈیوون، جڈاں مولوی دین دی آڑ ءچ کروڑ پتی بنڑ ونجن، ول بچے کُسدے راھسن عورتاں بیوہ تھیندیاں راھسن، کہیں دی عزت تیں عصمت محفوظ نہ راھسی، میڈی دھرتی میں شرمندہ ھاں، میڈے شھیدو میں شرمسار ھاں، میں تاں اے گال سوچ کے رُو پُونداں جڈاں تساں محشر دے ڈینھ پُچھسو ساڈیں قربانیں دا کیا صلہ ڈتا ھاوے ساڈی دھرتی تیں کیکوں حکمران بنڑایا ھاوے اساں کیکوں پیش کریسوں،، میڈے شھیدو میکوں، معاف کر ڈیوائے میں کنیں ایھے بھنے تُرٹے لوظ ھن جیرھے لکھی راھنداں، متاں، میں جھئیں کہیں پاگل دے دل ءچ اثر کر ڈیون.