مردی غیرت

جتھو تک میکوں یاد ھے سب توں پہلے بیغرتی دا فتوی اوں بندے تے لگا ھا جئیندے گھر ریڈیو وگدا ھا ساری وستی آلے ہر جھوک وساخ ہنباہ تے بیھ کے اُوں بندے تے لعنتاں بھجیندے ہن جو دھریں بھینڑیں دے ادھ ءچ بیھ کے ریڈیو تے گانڑے سُنڑدے ،خیر وقت پاسہ وٹایا ساڈے ہتھیں سانیو ٹیپ آیا ٹیپ وی اینجھا آیا جو اوکوں اینجھا سجائ ودے ھوندے ہن جیویں اجکل پٹھانڑ آپڑیں ٹرک کوں سجیندن.

گلوکار چند ہوندے ہن عطاءاللہ ،کریم بخش پروانہ،فرید گشکوری،وغیرہ،جڈاں ٹیپ وجے ھا فُل آواز ءچ وستی آلے آھدے ہن اے ہنے کمی کمین انھیں نال مر جی وی رکھڑاں نا جائز ھے ، اجاں اے مصیبت گچی ءچ ھئ اتے ٹی وی ٹھاہ تھئ پچھیں تاں اُو گھرانہ واجب القتل ھا جئیندے گھر ءچ اے تمیز کائینا ھئ کہ جوان بچیں دے ھوندیں ھوئیں غیر مردیں دا ڈرامہ ڈکھیندا پئے،مزے دی گال اے ھے اوں ویلھے جئیندے گھر ٹی وی ھئ او وڈی مصیبت ءچ ھا کیوں جو محلے دا ہر بال اوں گھر ہوندا ھا آخر اساں ایں گال تے تھوڑے جھئیں بیغرت تھئے کہ ساڈے بال پرائے گھر ٹی وی ڈیکھنڑ ویندن تہوں آپڑیں گھدی سے.

آؤ سئیں اج ڈاہ ڈاہ روپے جمع کراؤ ویسیار کرائے تے چئیندے پئے ہیں اے وت نویں بلا ھئ اوندے وچ ڈانس ہن سلطان راھی تے دھرمیندر دے پُوزے ہن ،ساری رات کہیں شیطان قسم دے سنگھتی دی جاہ تے اے پروگرام بنڑدا ھا ساری رات مونھ تے پانڑی دے چھٹے مار مار فلماں ڈیکھوں ھا تے وڈ وڈیریں دے نظریں ءچ اساں ابلیس توں گھٹ کائینا ھاسے.

اجاں شاید ساڈی غیرت کجھ ودی ھئ کیونکہ ساڈی وستی دے واٹ اگر کوئ ٹریکٹر آلا ٹیپ وجائ آئے اوندے سر تیں ڈانگ لازمی پٹی گئے ہیں وائے کنجر آ ساڈے گھر تک تیڈے کنجرپ دا الا آندا پئے.

ترقی یافتہ دور ءچ پیہ آئے ہیں سی ڈی آ گئی اُو کجھ ڈینھ تاں کرائے تیں چلیاں قسمت خراب ھئ دوکانداریں دی کہ او بہوں سستیاں ملنڑ لگ گیاں ہر بندے گھن کے گھر ولا رکھی ،اجاں سی ڈی لاتھی ہئ کیبل پہنچ گئے ،غیرت آلی بلا دے وی آخری ساہ ہن جڈاں موبائل پہنچے،اج اساں ہیں موبائل ھے یو ٹیوب ھے اُوپرا منی تے یوسی بروژر ھے چس ھی چس ھے تے غیرت ،اللہ دا بخش ھووس ھئ وڈی چنگی. (جمیل بلوچ)