محمود احمد محمود

1969 ء تا 2014ء

محمود احمد محمود میانوالی دا ہک پڑھیا لکھیا خدا داد شعری صلاحیت دا حامل شاعر ہا جو میانوالی دے ادبی اُفق تے مہتاب بن کے ابھریا تے چوڈویں دے چندر وانگوں اپنے اشعار دی روشنی پھیلائی تے ول اچانک غروب تھی گیا۔اجاں اوں بہوں کجھ لکھناں ہا تے بہوں کجھ علم و ادب دی روشنی پھیلاونی ہئی ۔مگر موت دا قاصد وقت توں پہلے آگیا ۔لیکن محمود احمد محمود جتناں تے جو کجھ وی لکھ گئین اوہ انہاں دے ناں کوں زندہ رکھن واسطے کافی ہے۔

(1) غزل

دل میڈا حالیں وی ڈکھدے ،چشم تر حالیں وی ہے

سانولا تیڈے وچھوڑے دا اثر حالیں وی ہے

زندگی ہک شخص دے توں حوصلے کوں داد ڈے

زندگی ہک شخص تیڈا ہم سفرحالیں وی ہے

چندر حالیں وی ترسدے اوں مٹھل دی دید کوں

کہکشاں اوں سانولے دی راہگزر حالیں وی ہے

اپنے پاگل پن دا ڈیواں ہور میں کہڑا ثبوت

تیڈے رستیاں تے میڈی کملی نظرحالیں وی ہے

ساری دنیاں چھوڑ کے توں کول میڈے آگئیں

پر تیڈے محمودؔ کوں نکھڑن دا ڈرحالیں وی ہے