مائیکل فیراڈے
مائیکل فیراڈے ہک انگلستانی سائنس دان ہئی۔ او 22 ستمبر 1791ء کوں انگلستان اچ پیدا تھیا۔ اُوں نے برقناطیسی قوت تے برقناطیسی کیمیا تے بہت کم کیتا۔ اُوں نے برقناطیسی تحریض (Electromagnetic induction) دریافت کیتی۔ اگرچہ اُوں نے ٻہوں گھٹ رسمی تعلیم حاصل کیتی ہئی مگر اڄ سائنس دی تاریخ اچ او ہک ٻہوں اہم ناں ہے۔ بطور کیمیا دان اُوں نے بنزین دریافت کیتی۔ البرٹ آئنسٹائن اپݨے پرس اچ اُوندی تصویر آئزک نیوٹن تے جیمز کلیرک ماکسویل دے تصویراں دے نال رکھدا ہئی۔ مشہورسائنس دان ایرنسٹ ردرفورڈ دا آکھݨا ہے کہ جݙݨ اساں اُوندی ایجادات تے اُنہاں دے اثرات سائنس تے صنعت تے ݙیکھدے ہیں تاں کوئی اعزاز اتنا وݙا نی کہ فیراڈے کوں ݙیویج سڳے، جیہڑا ہر زمانے دا عظیم ترین سائنس دان ہے۔ اُوں نے اپݨی زندگی اچ سر دا خطاب ݙو دفعہ ٹھکرایا۔ اُوندا 25 اگست 1867ء کوں اپݨے گھر اچ انتقال تھی ڳیا۔
