قوم کیتے ہک نویں ارداس
ارداس اخبار ایچ قوم کیتے ھک نویں ارداس چلاک قوم پرستی،وسائل دی ونڈ تے ٻھُلے ٻھَالے میٹھے سرائیکیں ہک طالب علم ہووݨ دے ناتے میکوں قوم پرستی دی تعریف تاں شائید نیں آندی لیکن اوندے نال جڑے ریاست دی ݙوڄھی قومیں دے فائدے تاں ضرور میں سمیت سارے اندھے سرائیکیں دےاکھیں دے سامݨیں ہن ڄݙاں سندھی قوم پرست رہنما سائیں جی. ایم۔ سید اے نعرہ لایا “مونجھو مونڄھو مونڄھو سندھ آسانڄھو “ ایویں شیدی قبیلے دے سردار وی نعرہ لایا” مرسوں مریسوں سندھ نہ ݙیسوں” شائید انھیں قوم پرستیں تے سیاسی رہنمائیں دی کاپی کریندے ہوئیں پنجاپ دے چوھدری تے نون لیگ دے قائد وی آپݨی سیاست کوں “ جاگ پجاپی جاگ تیری پڳ نوں لگ گیا لاٹ” دے رنگ نال رنگیلا بݨا ݙیتا.
ایویں کے پی کے دے خانیں تے بلوچسستان دے سرداریں وی اپݨی اپݨی قومیں کوں قوم پرست سیاست نال جڳاوݨ دی کوشیش کیتی.اے قوم پرستی دا شعور تے قوم پرستیں دے کرارے نعرے ریاست کوں سمڄھ آوݨ لگ پئین تے ریاست انھیں دے وسائل تےانھیں دا حق ݙیوݨ شروع تھی گئی. نال انھیں کوں ریاست دا برابر دا شریک وی سمڄھݨ لگ گئی جیندا انت پی پی پی تے نون لیگ دی واری حکومت دے مزے دے بعد سنجراݨی جھئیں ان سڄاݨوں تے ان سیاسی بندے دے سینٹ چیرمین تے تھیا تے نال این.ایف. سی ایورڈ دے زرئیعہ ساریں قومیں ملک توں برابر دے وسائل وی ڳدھے. ہݨ جے کر گالھ کراں ست کروڑ بُھلے بھالیں میٹھیں دی تاں وی میکوں انھیں دے جوشیلے نعرے یاد آ ویندیں جیویں جو “ دلاں تیر بیجا آپو”، “آیا آیا شیر آیا” تے “ روک سکو تو روک لو تبدیلی آئی رے” جیندے زریعہ انھیں وی آپݨی سیاست خوب چمکائَی تے ہر دور ایچ نویں طریقے نال پھودو بݨدے رہے ڳئے تئیں نال انھیں دے وی وسائل انھیں بھولے بھالیں دی بجائے تخت لاہور تے ملک دے ٻے صوبئیں تئیں خرچ تھیندے رہے ڳئے.
جے اڄ اگر اساں سرائیکی آپݨے آپ کوں ناں بدلیا تاں ساݙے وسائل،ساݙی زراعت، ساݙی صحت، ساݙی تعلیم، تے سبھ کولو ودھ ساݙی ذندکی ایویں تباہی و بربادی دا شکار تھائی رہیسی. ساکوں وی ساݙے وسائل آپݨے اوتئیں خرچ کرݨ تے ملک ایچ برابری دی حصداری کیتے ݙوڄھے قومیں آلی کار کہیں ٻے دے نعرے لاوݨ دی بجائے “جاڳ سرائیکی جاڳ”، “ڳھنسوں ڳھنسوں سرائیکستان ڳھنسوں” تے “مرسوں مریسوں آپݨے وسائل ناں لوٹیچݨ ݙیسوں “ جھئیں چلاک قوم پرست بیانئیں تئیں سرائیکی قوم دی ٻیڑی کوں خود چلاوݨاں پوسی تے نال میٹھے سرائیکیں آلی کہاوت کوں وی نمکیلا بݨاوݨاں پوسی کیوں جومسائل دی جنگ ایچ ہمیش میٹھے کوں مار آندی اے. [١]