قراقرم پہاڑی سلسلہ

سلسلہ کوہ قراقرم، پاکستان، چین تے بھارت دے سرحدی علاقیاں اچ واقع ہے۔ ایہ دنیا دے چند وݙے پہاڑی سلسلیاں وچ شامل ہے۔ قراقرم ترک زبان دا لفظ ہے جیندا مطلب ہے کالی بھربھری مٹی۔ کے ٹو، سلسلہ قراقرم دی سب توں اچی چوٹی ہے۔ جیہڑی بلندی وچ دنیا وچ ݙوجھے نمبر تے ہے۔ ایندی بلندی 8611 میٹر ہے اینکوں گوڈسن آسٹن وی آکھا ویندے۔ قراقرم اچ 60 توں زیادہ چوٹیاں دی بلندی 7000 میٹر توں زائد ہے۔ ایں سلسلہ کوہ دی لمبائی 500 کلومیٹر/300 میل ہے۔ دریائے سندھ ایں سلسلے دا اہم ترین دریا ہے۔ ایں پہاڑی سلسلے وچ وݙے وݙے گلیئشرز پاتے ویندن جنہاں وچ سیاچن ، ہسپر، بالتورو، بیافو تے بتورا اہم ہن۔ قراقرم دے پہاڑی سلسلے اچوں گزردی ہوئی شاہرہ قراقرم یا شاہرہ ریشم ، درہ خنجراب دے ذریعے پاکستان تے چین کوں آپس اچ ملیندی ہے۔