فوج اچ شامل تھیوݨ؟

سرائیکی وسیب دے لوک ہمیش توں اکھیندے امدن جیویں سندھیں کوں فوج ا چ نمائندگی ݙیوݨ سانگے سندھ رجمنٹ بݨائی ڳئی اے ، ایویں سرائیکی کوں نمائندگی ݙیوݨ سانگے وسیب رجمنٹ بݨائی ونڄے ۔ پر سرائیکی وسیب دی فریاد تے کوئی توجہ نی ݙیندا، ہر کوئی ݙاڈھے دی سݨدے ، ہینڑیں دی نی سݨدا۔ مشہور اکھاݨ دے نال نال حسین گوہر تاں اے وی آکھئے جو ’’ غریب بھاویں حسین ہووے ، غریب دی ڳالھ کون سݨدے ؟ ‘‘ کجھ لوک آکھدن سرائیکیں کوں سب کجھ ملدا رہندے ، انہائیں رووݨ دی عادت بݨا گھدی اے۔ اساں آکھدوں فوج دے عہدیں وچ وسیب کوں کیا ملئے ؟ آؤ لیکھا کروں ، یا ول آؤ تڑے چا کریندوں ، پچھلے 67 سالیں وچ جیرھا کجھ تہاکوں ملئے او اڳلے 67 سالیں سانگے اسیکوں چا ݙیو تے جو اسیکوں ملئے او تُساں چا گھنو ۔ چوݨ تہاݙی پچوݨ اسیݙی ۔ یار! خدا دا ناں منو ، ایویں نہ کرو ، کجھ اساݙی سݨو۔ تُساں بنگالیں دی وی نہ سݨدے ہاوے ، اساݙے نال بنگالیں آلی کوا نہ کرو، کجھ تاں خدا توں ݙرو۔ اساں آکھدوں جݙاں سندھیں دیواریں تے لکھیا ’’ نہ کھپے پاکستان نہ کھپے، پاکستان جو وفادار آ غردار آ غردار آ‘‘ ول تُساں انہائیں دی ڳالھ بھڄ تے سݨی تے سندھیں کوں سب کجھ ݙتا۔ رجمنٹ وی بݨا ݙتی تے سی ایس ایس دا کوٹے دی میعاذ وی اڳوں کر ݙتی پر اساکوں کجھ ݙیوݨ دی جاہ تے او وی کھس گھدے جو اساں کنے پہلے توں ہا پیا ۔ بہاولپور رجمنٹ دی صورت ا چ وسیب دی رجمنٹ ہئی ، تُساں اینکوں وݙا کرو ہا پر تُساں اینکوں تکھے تکھے بھن تروڑ تے ٻئے رجمنٹاں نال رلا ݙتا۔ ہُݨ جیرھے لوک آکھدن جو سرائیکی وسیب کوں سب کجھ ملدا رہ ویندے ۔اے ہروں بھروں روندے رہ ویندن۔ میں آکھداں جو ( 1947) جنرل محمد شریف توں گھن تے جنرل راشد محمود تئیں مسلح افواج دے پندرہ سربراہویں وچوں سرائیکی کتنے آئن؟ پاکستان بݨݨ دے بعد جنرل سر فرینک میسروی تے موجودہ جنرل راحیل شریف تئیں بری فوج دے پندرہ سربراہیں ا چ سرائیکی کتنین؟ پاک بحریہ دے پہلے وائس ایڈمرل ولفریڈ توں موجودہ ایڈمرل سندیلہ تئیں ماسوا ہک ادھ باقی کہیں دا تعلق سرائیکی وسیب نال نہ ہا ۔ فضائیہ دے پہلے ائیرمرشل ایلن پیری کین تے موجودہ طاہر رفیق بٹ تئیں کہیں دا تعلق وی سرائیکی وسیب نال نی نظر امدا۔

احٖ سرائیکی وسیب دے لوک جیکر اے مطالبہ کریندن جو انہاں کوں وفاقی اکائی منیا ونڄے ۔ جیکر او سرائیکی رجمنٹ دا مطالبہ کریندن تے اے آکھدن جو آئین پاکستان دی متعین کردہ حدود دے اندر راہندے ہوئے انہاں کوں انہاں دا حق ݙتا ونڄے تاں سرائیکی قوم دی حب الوطنی دی قدر تھیوݨی چہیدی اے ۔ انہائیں دے اندر دے محبت دے مارے ݙکھ کوں سمجھݨا چہیدے ۔ اے کیا رویہ تھیا جو جیرھا ݙنڈکا ݙکھاوے ، اوندے اڳوں سارا چھٻا کھول ݙیو تے غریب ، شریف تے گگدام ہووے ، اونکوں بھورا وی نہ ݙیو ۔احٖ بلوچستان آلے قومی ترانہ نی سݨدے ، پاکستان دا جھنڈا نی لیندے تاں تُساں کیڈٹ کالج ، ملازمتاں ، فوج ا چ بلوچستان دے ہزاراں طالب علماں کوں وظیفے تے آغاز حقوق بلوچستان دے ناں تے پتہ نی کیا چاتے انہائیں دے پچھوں ودے بھڄدو۔ ݙوجھے پاسے سرائیکستان دے لوک اپݨے حق حقوق دی ڳالھ کریندن تاں انہائیں دے ناں تے وی اعتراض کریندو ۔ بھلا تُساں آپ ݙساؤ جو جے بلوچیں دا بلوچستان حلال اے تاں سرائیکیں دا سرائیکستان حرام کیوں اے ؟ یار ! خدا دا ناں منو ، احٖ وی تہاݙے ݙوڑے معیار؟ کیا تُساں احٖ وی ٻے کوں بودن ت بھکن تے اپݨے آپ کوں سیاݨے سمجھدو۔ یار! ایویں نہ کرو ، تُساں آپ آپ تاں دوکھا ݙے سڳدو، اسکیوں دوکھے ا چ نی رکھ سڳدے ۔ یار بݨو یار مار نہ بݨو۔ سرائیکی وسیب دے لوکیں دی وطن نال محبت کوں کچا نہ تھیوݨ ݙیو۔

یاد رکھو سرائیکی قوم تے سرائیکی وسیب پاکستان دا دل اے ۔ سرائیکی وسیب دی جغرافیائی اہمیت کوں سمجھو، افغانستان ، فاٹا تے خیبرپختونخواہ تے بلوچستان ا چ وطن دشمن سازشاں دا مقابلہ سرائیکی وسیب دے سرحدی علاقیاں ا چ وسݨ آلے محب وطن سرائیکی کر سڳدن ، جے تُاں سرائیکی وسیب دے ٹانک تے دیرہ اسماعیل خان ،دیرہ غازی خان ، راجن پور ، رحیم یارخان کوں کمزور کریسو تاں غیر ملکی طاقتاں کھا ویسن تے جے سرائیکی صوبہ بݨا تے انہائیں علاقیں کوں تکڑا کریسو تاں اے علاقے  وس بھرے دیس دشمن، نانگیں دا سر داپھ ݙیسن ۔ یاد رکھو مکار انگریز معدنی دولت نال مالا مال علاقیں تے قبضے سانگے اوہا چال چلدا پے جیویں او جنوبی افریقہ وچ چلیا ہا ۔ افغانستان ، خیبرپختونخواہ تے بلوچستان ا چ کرائے دے قاتلاں کوں او مجاہد تے جنگجو بݨا تے پیش کریندا کھڑے ، قبضے دے بعد انہاں حریت پسنداں کوں او ایویں مار ݙیسن جیویں افغانستان وچوں روس دے ونڄݨ دے بعد مجاہدین کوں کٹھا کر تے مار ݙتا ہانے۔

حوالہ

·        معروف سرائیکی دانشور سئیں ظہور دھریجہ دی کتاب سرائیکی قلم قبلیہ وچوں چوݨ