فدا دھریجہ

اصل ناں    محمد شفیع

قلمی ناں    فدا ؔدھریجہ

جٖمنْ        1950ء

جاہ پتہ      دھریجہ نگر۔خان پور ضلع رحیم یار خاں

محمد شفیع فدا دھریجہ (مرحوم) سرائیکی زبان دے وڈے لکھاری ، ہک بہوں سوہنے خطاط تے ہنس مکھ انسان ہن ۔ انہاں بہوں ساریں سرائیکی شاعریں دیں کتابیں کوں اپنی خطاطی دے نال سوہنڑا بنا تے شائع کیتا ۔ او آپ وی بہوں چنگے شاعر ہَن ۔

غزل

بھُلا ڈٖیووں سبھے پچھوال  اپنْاں

ذرا سوچو ہے کیجھاں حال  اپنْاں

جڈٖاں نہ ریت وی روہی دی رہ گٖئی

کتھاں چرسے تے پلسے مال اپنْاں

توں حق  اپنْاں حریفیں توں ولا گھن

الا چپ وچ نہ ویلا گٖال اپنْاں

جے نہ رووے تاں ماء نی کھیر ڈٖیندی

نتاں کیکوں ہے کوڑا بٖال اپنْاں

نہ آونْ ڈٖے توں آلس تے جوانی

فداؔ دشمن نہ بٖیٹھا پال اپنْاں

؎کہیں دی ہار جت گٖئی ہے تے کہیں دی جیت ہر گٖئی ہے

بچاری زندگی میڈٖی تاں حیرت وچ گزر گٖئی ہے

فلک ڈٖہدا کھڑے خاموش تھی برباد دھرتی کوں

ایندے اجٖڑنْ تے ڈٖس کہیں دی کیڑھی ماڑی اُسر گٖئی ہے

٭٭٭