اَساں کون؟

کِتھوں دے واسڑی

اَساں کیں دھرتی داڄم

ہوں کیڑھی ذات سݙیندڑے

تے ساڈا کیا ھے ناں

کوئ ناں نی چھکدا نوکریں

نہ ٻانھیں چَھکدی ذات

اساں بے وارث

اساں اوترے

نہ ساڈی کوئ اوقات

ساڈے ویسر ویر فقیر بݨ

ودے در در خیر منگن

ساڈے راول رُل پردیس موئے

ساڈیاں سمیاں ویݨ کرنِ

کئ مومل سومل مر سُتڑیاں

نہ کاک کندھی نہ ماڑ

اَساں ہون٘دیں ترکیں تَرس گئے

ساڈے ویری عیش لَہن

ساڈے تن تے لیراں لڑکدیاں

ساݙیاں بھیݨیں کنو ٻُٹ

نہ دِھیریں دے سِر بوچھݨیاں

ساڈیاں میریں مندڑے حال

ساڈے ننݙھڑے بُکھ توں ٻاکدے

ساڈے وڈکے ڈُکھ دے وات

ساڈے بُکھ دے قصے ٻاہَر تئیں

ساڈی غربت جگ بدنام

ایں اپݨی بُکھ تریہہ ننگ تے

ساڈیاں اکھیں رَت پیاں سمدیاں

ساڈے من مان٘دے ڈینہہ رات

ودے رُلدوں جھر بر جنگلیں

اساں مارئیے مال دی کار

جِنھاں کُھوہ کُھوہ تے ساکوں جوپڑاں

اساں کُسڑاں اَنت بازار

(غربت جڳ بدنام) عاشق بُزدار کمپوز دا پورھیا: ملک محمد رمضان نوید آرائیں