غفور بلوچ
مزدور شاعر,غفورؔ بلوچ
سئیں غفور بلوچ ہِک مِٹھا تے سریلا شاعر ہے۔جیکوں پڑھدیں چس آندی ہے۔ایندی شاعری اچ ٹھاندے لفظ اپݨی مثال آپ ہن،جنہاں کوں تسبیح دے داݨیاں وانگ پرو کے شعری شکل ݙیوݨ انہاں دا کمال ہے۔وسیب نال جُڑت تے زبان دا سُݨھپ انہاندی دی شاعری اچ واضح نظردے۔ماء ٻولی زبان اچ اپݨیں جذبیں دا اظہار کرݨ آلے مزدور شاعر غفورؔ بلوچ نے وسیب دے مسائل، رنگِ ثقافت، عشق و محبت،امن و آشتی تے درس و نصیحت دا مال متاع کٹھا کر کے ”آسیں دا ست ماڑ“ اُساریئے۔ غفورؔ بلوچ شاعری دیاں ساریاں صنفاں تے ݙاڈھی سنبھال رکھدے۔ڳیت، ݙوہڑہ، غزل، نظم تے مسدس اچ کمال دی شعریت ہے۔وطن دی محبت وی انہاں دی شاعری دا خاص موضوع ہے۔جݙاں میں ریڈیو پاکستان ملتان دے شعبہ موسیقی دا انچارج ہم تاں انہاں دا کافی سارا کلام ریکارڈ کیتا جیڑھا جو سُݨݨ آلیاں وچ پسند کیتا ڳیا۔ٻالاں دے نشریاتی پروگرام اچ انہاں دے ٻالاں دے ڳیت دے ٻول ݙیکھو!
ماء دھرتی تے ناز ہے ساݙا
ساݙی محنت راز ہے ساݙا
علم توں مالا مال ہیں سوہݨے
ماء دھرتی دے نال ہیں سوہݨے
دنیاں دی مطلب پرستی انسانیت کیتے وݙا المیہ ہے۔جݙاں کوئی پیار پرست کہیں سوہݨے بندے نال بے لوث پیار کریندے تاں اوندے پیار کوں اوہ سوہݨاں بندہ اپݨے مطلب دی آڑ بَݨا گھندے تے وݙی بے رحمی نال او کنیں اپنے مطلب کڈھݨ لڳ ویندے۔جیندے نتیجے وچ اوہ پیار پرست مایوس تھی ویندے تے محبوب دی مطلبی خواہش کوں پرکھیندیں ہوئیں مجبوراََ بے ساختہ اَہدے۔
؎پاڳل دلڑی نہ تھی کملی نہ کر کہیں کوں جڳ تے پیار
مطلب دی ہے دنیاں ساری مطلب دے ہِن سارے یار
غفورؔ بلوچ وقت دے دَڳ تے ٹُردا اوہ اݨ تھَک پاندھی ہے جیڑھا آپ وی وقت دیاں قدراں کریندے تے نال ݙوجھیاں کوں وی تلقین کریندے جو نکماں وقت گزار ݙیوݨ اپݨی تقدیر کوں پِچھوہاں کرݨ دا سبب ہے۔اپݨی سئیت دا ستارہ چمکاوݨ کیتے ہر لحظہ محنت کرݨ وقت کوں قابو پا گھِنݨ دا ناں ہے تے ایہو انسان دی عظمت دا راز ہے۔جیڑھا ہِک نظم دے روپ اچ ظاہر کیتا ڳئے۔
اڄ وقت کوں ویکے پا ݙے توں
سر دھڑ دی بازی لاݙے توں
خود اپݨاں رُعب ڄما ݙے توں
ہک جاہ تے وقت کھڑا ݙے توں
تیݙا چمکے ناں چودھار سڄݨ
نہ ویلھا وقت گزار سڄݨ
آخر اچ اے دعا ہے جوغفورؔ بلوچ دا”آسیں دا ست ماڑ“قارئین سانگے سخن آفرینی دا نویکلہ تکلم ڄاتا ونڄے تے انہاں دا ذوقِ مطالعہ وادھو ودھ تھیوے۔آمین!
آصف خان کھتران
ریڈیو پاکستان ملتان