عرب اسرائیل جنگ ١٩٤٨ء
1948ء وچ ریاست اسرائیل دے قیام دے نال ہی عرب تے اسرائیل پہلی وار ہک ݙوجھے نال ٹکرائے تے اس ٹکراؤ کوں عرب اسرائیل جنگ 1948ء دا ناں ݙتا گیا جبکہ اسرائیلی اینکوں "جنگ آزادی" آہدے ہن۔ اسرائیل نے فلسطین تے قابض تھیندے ہی علاقے دی عرب اقلیت تے ظلم دے پہاڑ توڑ ݙتے جس دی وجہ نال عرباں کوں مجبوراً اپݨا وطن چھوڑنا پیا۔ بے گھر عرباں دی تعداد جلد ہی 10 لکھ تک پہنچ گئی۔ عرب پوری طرح مسلح یہودی دستیاں دا مقابلہ نہ کرسڳے تے 15 مئی 1948ء تک اندرون فلسطین وچ عرباں دی مزاحمت ختم تھی گئی۔ 14 تے 15 مئی دی درمیانی شب 12 بجے یہودیاں نے تل ابیب وچ ریاست اسرائیل دے قیام دا اعلان کر ݙتا۔[١]
عرباں نے اس ریاست کوں تسلیم کرݨ توں انکار کر ݙتا تے مصر، شام، اردن، لبنان تے عراق دی افواج نے اسرائیل تے حملہ کر ݙتا۔ ایہ جنگ 1949ء دے امن معاہدیاں دے تحت ختم تھی ڳئی۔
سلامتی کونسل دے حکم تے 11 جون 1948ء کوں طرفین نے جنگ بندی کر ݙتی۔ اس دے بعد جنگ شروع تے بند تھیندی رہی اتھاں تک کہ 1949ء وچ عرب ملکاں کوں اسرائیل توں الگ جنگ بندی دے معاہدے کرنا پئے تے اسرائیل دے وجود کوں عملاً تسلیم کرݨ تے مجبور تھیوݨاں پیا۔ 11 مئی 1949ء کوں اسرائیل اقوام متحدہ دا رکن بݨا گھدا ڳیا۔
اس جنگ وچ اسرائیل دے 6 ہزار 373 باشندے مارے ڳئے جنہاں وچ 4 ہزار فوجی تے باقی شہری ہن۔ عرباں دے جانی نقصان دے حتمی اعداد و شمار اج تک معلوم نی تھی سڳے تاہم ایہ تعداد 5 توں 15 ہزار دے درمیان ہے۔