عاشق بزدار دی شاہکار نظم

۞۞سانولا۞۞کلام، سَئیں عاشق بُزدار

سانولا اڄ اچݨ چیت میلا تھیا

آمیݙےکول ٻَہہ رَڄ کےڳالھیں کروں

سَئےورھیاں تُوں وِچھوڑے دِی ہَئوں مار وچ

مَتاں سِکدےمَروں، رَڄ تےڳالھیں کروں

لمبےچوڑھےوِچھوڑےدیاں سب تَلخیاں

چھوڑہِک ݙُوجھے دے رَل تےݙُکھڑےوَنڈاؤں

پیارپُوجا دےسارےحوالے سَڄݨ

چُم اکھیں تےرکھوں سارےجگ تےکِھنڈاؤں

مَتاں دنیا تُوں نفرت دی چھاں ڈَھل پووے

مَتاں دھرتی تےاُلفت دا سِجھ چڑھ پووے

یاد ہَئی سانولا ہِکی گَھٹی دےوچ تیݙی ماڑی دی کَچھ میݙا کوٹھا کچّا

ریشمی ویس پاگھروں نکلیں جوہا تیکوں پیریں تاݨیں رَڄ تے

ݙہداہامی

میݙا پاڑیاچولا تیݙےکم اَندا ہاتیݙی جُتی تےمٹی نہ سَہندا ہامی

تیݙےسنڳ سِیرتیکوں رُکیندےجوہَن

یادکر سانولا! تُوں ناں راہندا ہان٘ویں

چھوڑ بنگلےدی چھاں میݙےچھاندݨ تَلے

اکثرنال میݙےآٻہنداہانویں

سارا ݙینہہ سَن٘گ سینگیں دےکھیݙوں ہاپئے

شِیدݨیں، تیربَھناں تےاَندھڑا قصائی

رات تھیوےہا تاں لُک چَھپاکھیݙوں ہا

تیݙی واری اِٹّی دی وی مَیں چَیندا ہَم

ایویں کِھل کِھیڈ وچ جےاَلا تھیوےہا

یادکرتیݙےواروں اَلینداہامِیں

کِھیݙدیں کھیݙدیں تَھک جےپون٘دےہاسے

ݙوہڑے، کافیاں فریدݨ دیاں ڳان٘دےہاسے

مَست ساوَݨ سُہیلے دی رُت آن٘دی ہائی

تاں وَہَل وَہندےوچ رَل کےدَھاندےہاسے

روہی ویندیں کُونجیں دےقطاریں کُوں سَئیں

سَخی سرور دےپھیرے لَوین٘دے ہاسے

رَاݨی اُوچی تےپَندھری دےمیلیں اُتے

کٹھےچَرکھےچݙولیں تےجُھوٹوں ہاپَئے

ہَراُلارےتےسوری سُریندے ہاسے

ہَراُتارے تےچاگھاں کرین٘دےہاسے

یادکراُوکریمݨ دی ٹولی سَڄݨ

جین٘دا نقلی ݙیوایاٻَتڑ ہوندا ہا

بادشاہ دےاُتےتَک ناں پَن٘دی ہاسی

اُون٘کوں کھوٹیاں کھریاں ڳالھیں سُݨویندا ہا

چُپ دےمارئیےغریبیں کُوں کِھلویندا ہا

یاد ہائی میرپُھلّو براتی کُوں

ڈھولک، نغارہ وَڄاوَݨ سِکھاوےجوہا

تاں نغارےدی کئوتےسَڄݨ سانولا

ساݙا مَن کِھلداہا ساݙا دِل نَچدا ہا

ساکوں اندروں نغارےدی کئوآن٘دی ہائی

اساں ساریاں دی خاہش ایہا ہون٘دی ہائی

اساں ڄئوں ہاسَبھےکَہیں مِراثی دےگھر

کین٘جھیاں معصوم خاہشاں ان٘در مَرسُتیاں

سارےخوشیاںدے سیون٘ج سُوا تھی ڳئے

تَئیں تاں سُکھ سیجھ سِتری تےلَان٘واں لَدھیاں

میکوں روزی دی سُولی تےجُھوٹےمِلئیے

میݙیاں آساں سَبھے دَربدر تھی ڳئیاں

چوݙاں وَرھئیےنبھائےمی تیݙی تان٘گھ وچ

سان٘ولا! اڄ اَچݨ چیت میلا تھیا

آمیݙےکول ٻَہہ رَڄ تےڳالھیں کروں

سَئےوَرھیاں تُوں وِچھوڑےدی ہاؤں مار وچ

مَتاں سِکدےمروں رَڄ تےڳالھیں کروں.

کمپوز دا پورھیا: ملک محمدرمضان نویؔدآرائیں...