ظہوراحمد فاتح

اصل ناں       ظہور احمد

تخلص          فاتح

جمن            1954ء

تعلیم           ایم، اے اسلامیات

پیشہ            ریٹائر پروفیسر

فون نمبر        03326066364

جاہ پتہ          تونسہ شریف

پروفیسر ظہور احمد فاتح 21مارچ1954ء کوں تونسے دی نواحی وستی شیراںوالا وچ عبدالطیف خان سکھانی دے گھر پیدا تھئے۔افسوس جو انہاں دی نظر پیدائشی کمزور ہئی۔ابتدائی تعلیم انہاں پرائمری سکول حیدر والا وچ اوں زمانے دے ٹیچر ،اج دے معروف سرائیکی شاعر اقبالؔ سوکڑی کنوں حاصل کیتی تے اپنے استاد(اقبال سوکڑی)کنوں ای متاثر تھی کے فاتح صاحب بچپن توں ای شاعری دا آغاز کر ڈتا۔دوران ِ تعلیم اوہ پڑھدے وی ہن تے شعرو شاعری وی کریندے ہن۔گورنمنٹ ڈگری کالج ڈیرہ غازیخان توں ایف ، اے کر کے اگوں تے تعلیم جاری نہ رکھ سگئے تے ایں دوران آپ دی بصارت وی ختم تھی گئی۔کجھ عرصہ بعد ڈپٹی کمشنر ڈیرہ غازیخان سید آفتاب احمد شاہ فاتح صاحب دے حالات دے پیشِ نظرانہاں کوں ہک مکتب سکول اچ بطور مدرس بھرتی کرا ڈتا۔جتھاں فاتح صاحب پڑھاون دے نال نال بی، اے تے ول ایم، اے اسلامیات وی کر گھدا۔ایندے بعد آپ 1986ء اچ بطور لیکچرار اسلامیات گورنمنٹ ڈگری کالج بھکر تعینات تھی گئے ۔جتھوں تک فاتح صاحب دی شاعری دا تعلق ہے تاں بقول موصوف آپ  ہفت زبان شاعر ہن یعنی اردو، سرائیکی ، پنجابی،ہندی ،عربی، فارسی تے انگریزی دے شاعر ہن تے مختلف موضوعات تے مطبوعہ کتاباں دی تعداد 16ہے،جنہاں وچ ہک سرائیکی مجموعہ کلام ’’اساں بہوں دور ونجناں ہے‘‘وی شامل ہے۔

(1)غزل

کوئی صورت نئیں دلدار جھئیں

  کئی شخصیت نئیں یار جھئیں

اوں اکھ وچ بڈدا نئیں لبھدا

کوئی جھیل ہے ڈاڈھی تار جھئیں

جیڑھی غیر کوں اپناں کر ڈیوے  

کوئی دولت نئیں ایثار جھئیں

دل آہدے ڈیکھوں ہر ویلے  

مسکان تیڈی غمخوار جھئیں

دل ول ول دھوکا کھا ویندے  

تیڈی ’’نہ‘‘ وی ہے اقرار جھئیں