صفدر علی صفدر
اصل ناں صفدر علی
قلمی ناں صفدر علی صفدرؔ
جٖمنْ 1960ء
تعلیم میٹرک
پیشہ زمیندارہ
فون نمبر 0345 9833258
جاہ پتہ تحصیل پروآ ضلع ڈیرہ اسماعیل خان
(1)غزل
لکھودلڑی تیکوں ہٹکیا ہامی کہیں جاہ نہ پھس اوکھی تھیسیں
پندھ پیار دے اوکھے ہوندن چلسی نہ وس اوکھی تھیسیں
کچّے گھڑے تے رات کوں دریا وی ٹھلنْاں پئے ویندے
ویلا ہیوی ہُنْ سوچ گھن ہوسیں بے وس اوکھی تھیسیں
دلبر سجٖنْ دی گٖول وچ ٹُرنْاں پوندے ادھرات کوں
پیراں تے چھالے تھی ویندن ، ہوندی نی بٖس اوکھی تھیسیں
تھی در بدر رُلنْاں پوندے ، گھر بٖار سب بھُلنْاں پوندے
دلبر نظر آندا نہیں رہندی نی چس اوکھی تھیسیں
صفدرؔ تیکوں ہٹکیا ہامی کلھے نہ ونجٖ اوکھے سفر
راہیں ہُسّڑ کے مر ویسیں کھا ویسی تس اوکھی تھیسیں
٭٭٭