صادق تھہیم

1954ء تا 2015ء

شعری کتاب ’’بھالے ‘‘دے شاعر صادق تھہیم مرحوم 1954ء کوں محمد بخش تھہیم دے گھر ڈیرہ غازیخان پیدا تھئے میٹرک تک تعلیم حاصل کیتی۔شاعری دے حوالے نال اپݨے زمانے دے معروف شاعر سعید راشد دی راہنمائی وچ شاعری شروع کیتی، خوبصورت لبٖ ولہجے دے شاعر ہَن ۔نمونہ کلام ملاحظہ تھیوے۔

(1)غزل

نئیں ہور سڄݨ میݙا کئی تیݙے سوا جانی

کر معاف خطا میݙی نہ ڈھیر ستا جانی

دل میݙا وندل ویسی تئیں نال میݙا دلبر

ایہو تاں میکوں ݙسدائے فرقت دا دوا جانی

جند جان توں پیارا ہیں ازماکے سڄݨ ݙیکھیں

اتبار وݙی شئے ہے قسماں نہ چوا جانی

زندہ ہاں تیݙے ساہ تے دعویٰ ہے غلامی دا

رکھ بھیم بھرم میݙا مہݨے نہ ݙیوا جانی

ہک دید دا طالب ہاں بن دید نئیں کجھ سجھدا

ݙے دید میکوں دلبر اُڄڑے کوں وسا جانی

زندگی دا سہارا میں سمجھا ہے تیکوں صادقؔ

کر بھال توں شفقت دی روندے کوں رہا جانی

؎صادق خموش رہ ونڄ الفت دی بار گاہ وچ

عظمت تے پُڄدے جیڑھا گردن جھکا کے بٖولے