شیرِ پنجاب توں عثمان بزدار تائیں

'شیرپنجاب' توں عثمان بزدار تئیں

جڈاں وی تخت لہور دا جماندروحاکم حمزہ شہباز میڈے دھرتی واس عثمان بزدارکوں پُنڑلُنڑ کریندے یاول جیونیوز توں لہوری سوچ دے پرچارک پروگرام 'خبرناک' وچ بیٹھے مراسی وزیراعلی عثمان بزدار دی کِٹ لیندن اونکوں ہک جاہل بے شعور ان پڑھ ،بیکار، گونگاباتا تے حکم دا غلام اکھیندن، میکوں چنگاں تاں نی لگدا، دھرتی دی اسیس تھیندی اے، عثمان بزداردی بے زتی تھیندی ڈیکھ کے جتھاں تخت لہورنال نفرت ودھ ویندی اے اُتھاں عثمان بزدارتے ترس وی آندے۔ ایہاتخت لہوردی سوچ جیں ٹی وی، سٹیج ڈرامہ ناٹک تے فلمیں وچ سرائیکی زبان ثقافت کوں ہک پاسوں ٹوک بنڑائے تاں ڈوجھے پاسوں ظلم دا استعارہ بنڑاکے پیش کیتا گئے۔۔۔۔۔جیکرسرائیکی وسیب دا کئی بندہ بیوروکریسی وچ ترقی کرکے اُتے پُنے یاول کئی وزیرمشیر صدروزیراعںظم بنڑئیے تاں تخت لہور دی سوچ رکھن آلے حاکمیں اونکوں کرپٹ ظالم یا گالھا، بتوڑا ثابت کرن سانگے پورا زورلائے۔۔۔۔ہا، جیہڑا شیرپنجاب بنڑئیے اونکوں سیرھے پوائن۔

پر گالھ اے تلا سدھی وی کائنی، اتھاں شیرپنجاب دا اُپٹھ کرن وی ضروری اے، شیرپنجاب دا لقب تاں رنجیت سنگھ کوں ڈتا گیا ہائی، رنجیت سنگھ مویاتاں لہوروچ کئی شیرپنجاب (تاریخی حقیقت اے) لہور دے کئی لوکیں دعوی کیتاجو رنجیت میڈے گھر وی آندا ہا میڈا نکاپتر وی شیرپنجاب اے۔۔۔۔۔۔۔نی ملوم مصطفی کھر کوں کیہڑے حوالے نال شیرپنجاب آکھیاگیا تے لہوریں وی اونکوں شیرپنجاب من گھدا، او ڈینہہ تے اج دا ڈینہہ وسیب دا ہر گودا شیرپنجاب بنڑن چنہدے۔۔۔۔۔۔جیہڑا شیرپنجاب نی بنڑدا اونکوں یوسف رضاگیلانی وانگوں کرپشن دی علامت بنڑاڈتاویندے۔

گالھ پئی تھیندی ہائی وزیراعلی عثمان بزدار دی، جینکوں میں کڈانہہ نی ملیا، پر اوندے ابے سردارفتح محمدبزدار نال ہک ملاقات ہئی آپڑیں ہک ذاتی کم سانگے، میں اونکوں ہک بھلے مانس سردارجاتا, اے جانڑدے ہوئیں وی جوسردار فتح میڈی نئیں بھل جو میڈے مُلیر یونس خاں ایڈووکیٹ دا آدُر پیا کریندا ہائی جیں مہکوں انہاں کانڑگھلیا ہئی۔ اے بئی گالھ جو سردارفتح بزدار ضیاخنزیر دے ہتھیں دالایا بُوٹا ہائی، اونویں تاں وسیب دے سارے تمندار بُھتار لاٹ صاحبان دے لائے ہوئے بوٹے اِن، لاٹ صاحبان گھردے اندرہوندے ہن تے گودے درتے پہرہ ڈیندے ہن تہوں انہاں دیاں شکلاں ساڈے نال نی رلدیاں۔

کجھ گودے سکھ حاکمیں دے لائے ہوئے بوٹے وی ہن، گالھ کوں تھولا کروں تاں کہیں سکھیں کن کہیں انگریزیں کن جگیراں گھن کے مادھرتی داسودا کیتا، اج انہاں دیاں اولاداں وزارتاں گھن کے مادھرتی دا سودا کریندیاں آندین، فاروق لغاری ہووے یاعثمان بزدار کہیں نیانڑی دا بوچھنڑویچے کہیں مادھرتی دا بوبا کپیے۔۔۔۔۔۔۔۔میں کیویں اے گالھ من سگداں جیکرصوبہ محاذ نہ بنڑدا تاں لاٹ(خان) صیب صوبے دا معاہدہ لکھ کے ڈیندا؟ جیکرلاٹ(خان) صیب صوبے دا معاہدہ لکھ کے نہ ڈیندا کیا عثمان بزداروزیراعلی بنڑدا؟؟

ساکوں سُدھ ہووے نہ ہووے، پر تخت لہوردے بھنڈ چنگی طراں جانڑدن اے گونگا باتا نئیں بھل جومادھرتی دا سودا کرکے وزیراعلی بنڑیا بیٹھے، جے تلا پُنڑلُنڑکریسوں مپ ماری رکھسی! کیامیں وی ایں سودے شامل آں، میں کیا وسیب دا ہرواسی ایں سودے وچ شامل اے جنہاں کوں ہک گونگے باتے سردارتخت لہور دے ہتھ ویچ چھوڑئیے، ول جیکراوں سردارکوں تخت لہوردے بھنڈ ٹوک بنڑاون یااونکوں جاہل بے شعور ان پڑھ ،بیکار، گونگاباتا تے حکم دا غلام اکھیندن تاں میکوں کاوڑ کیوں پئی لگے، جیکر لگے تاں دھرتی دا سودا کرن والے بھوت بُھتارتے کاوڑکیوں نہ پئی لگے. (راݨا ابرار خالد)