شیدݨ

اے کھیݙ زیادہ تاں ٻالڑیاں کھیݙدین پر ایں کھیݙ کوں کجھ ٻال وی کھیݙدن. اے کھیݙ چھوہریں دی پسندیدہ کھیݙ ھ. ایں کھیݙ وچ ݙو کھݙکار ہوندن. ایں کھیݙ وچ وی پڳیا ویندے یا ٹاس تھیندے. ایں کھیݙ سانگے ہک ٹھیکری (پھیکری) دی وی لوڑھ ہوندی ھ بعض دفعہ کھلے یعنی جتی وی ورتئی ویندی ھ. ایں کھیݙ کوں شروع کرݨ توں پہلے بھوئیں تے لیکے مارکراہیں خانے بݨائے ویندن. اے خانےہک کھݙکار کیتے چار پنج یا چھ وی تھی سڳدن. ایویں بالکل نال رلیے ہوئے خانے ݙوجھے کھݙکار دے ہوندن. جہڑا کھݙکار ٹاس جتیندے او کھیݙ شروع کریندے تے انہاں خانیاں کوں کنڈھ کر تے ٻہہ ویندے تے ول اپڑیں پچھوں خانے وچ او ٹھیکری سٹیندے. خانے وچ ٹھیکری ٹھیک ونج ٻہہ تاں ٹھیک جے ٹھیکری کہیں لکیر نال لگ ڳئی تاں واری سڑ ویندی ھ یعنی مک ویندی اے تے ول ݙوجھے کھݙکار دی واری. جے ٹھیکری ٹھیک ونج ٻیٹھی تاں کھݙکار اٹھی تے ہک لت تے ٹردیں یا ٹپے مریندیں اوں خانے تک ویسی تے تھݙے نال سدھی او ٹھیکری ٻاہر کݙسی بھانویں ہک تھݙا مارے یا ݙاہ کئی فرق نی پر جے ٹھیکری کہیں لکیر تے ٻہہ ڳئی یا پاسے آلے لیکے توں ٻاہر نکلی تاں واری سڑ ویسی. جݙاں ٹھیکری ٻاہر آ ویسی او خانہ پُڳ ویسی تے اتھاں کاٹا لا ݙتا ویسی ول کھݙکار اتھاں رک تے سہی یعنی آرام وی کر سڳدے مطلب ݙوھاں پیراں تے کھڑ سڳدے. ایویں سارے خانے جیہڑا پڳا ویسی او جیت ویسی. ایں کھیݙ کوں کجھ جہیں تے نکی ٻئی تندیر وچ وی کھیݙیا ویندے. اتے خانہ پہلے ݙسایا ویندے جو ٹھیکری فلاں خانے وچ ویسی.