شوخ ریاستی
اصل ناں غلام نبی
قلمی ناں شوخؔ ریاستی
جٖمنْ 1937ء
شوخ ؔریاستی ریاست بہاولپور دے نامور بزرگ شاعر ہن۔خوبصورت روایتی شاعری کریندن۔
نقویؔ احمد پوری دے ناں آلے شاگرد ہن۔آپدی روایتی غزل دا رنگ ڈٖیکھو!
غزل
لکھوحضرت عشق دے گھن گھن لوڈٖے
دلڑی کھا نہ گھیرے بٖوڈٖے
نال لہو دے چٹھیاں لکھساں
انگٖلیں کپ کپ ٹُک ٹُک ڈٖوڈٖے
اتھاں بھاہ ہے ، اُتھاں بھاہ ہے
ہکو حال ہے ایڈٖے اوڈٖے
روہی ، ریگستان دے اندر
رہندن ڈوڈر زاغ دروڈٖے
بھیڈٖاں، بٖکریاں ،چھانگاں چھڑدین
نظرن گھٹے سنگلے ، موڈٖے
وگٖ کوں ڈٖیکھ کے سینہ ٹھردے
نچدے،بھجٖدے ،کڈٖدے توڈٖے
شوخؔ غزل وچ لفظیں دے توں
محنت کر تے سہرے پو ڈٖے