شفاء اللہ روکھڑی

گلوکاری دے شعبے وچ قدم رکھݨے توں قبل شفاءاللہ خان روکھڑی پنجاب پولیس وچ ملازمت کریندے ہن تاہم خواہش انہاں دی گلوکار بݨݨ دی ہی ہئی۔ گلوکاری دے شوق کوں پورا کرݨ کیتے انہاں نے پولیس دی ملازمت کوں خیرباد آکھ کے باقاعدہ طور تے گلوکاری دے میدان وچ 1984ء وچ قدم رکھ ݙتا۔ شفااللہ روکھڑی ݙاہ سال تک گلوکاری وچ محنت کریندے رہیے تے 1995ء وچ اپݨا پہلا البم ریلیز کیتا جیہڑا انہاں کوں کامیابی دی بلندیاں تک گھن ڳیا۔

فوک گلوکاری انہاں دی پہچاݨ بݨی۔ عطاء اللہ خان عیسیٰ خیلوی دے بعد اوہ ملکی سطح تے ضلع میانوالی تے سرائیکی خطے دی پہچاݨ بݨے۔ گلوکاری وچ انہاں ݙینہاں انہاں دا اپݨے ہی پتر ذیشان روکھڑی نال مقابلہ ہئی۔ شاعر افضل عاجز، مظہر نیازی، صابر بھیریوں، اعجاز تشنہ تے محمود احمد دے سینکڑاں گیت ڳائے جیہڑے پاکستان بھر وچ مقبول تھئے جنہاں وچ ’’میں ستی پئی نوں جڳایا ماہی‘‘’’آکھو سکھیو‘‘’’آ مل ڈھولا‘‘’’جیویں شالا دل جانی ‘‘شامل ہن۔ شفاءاللہ خان روکھڑی تے انہاں دے بیٹے ذیشان خان روکھڑی نے موسیقی وچ اپݨا ناں پیدا کیتا تے سوشل میڈیا تے انہاں دے سبکرائیبرز دی تعداد لکھاں وچ ہے۔ شفاءاللہ خان روکھڑی دے یوٹیوب تے 1.78 ملین سبسکرائبرز ہن جیندے توں اندازہ لایا ونڄ سڳدے کہ اوہ سرائیکی زبان نال محبت کرݨ والے لوگاں وچ کس قدر مقبول ہن۔

ڄم پل

شفاءاللہ خان روکھڑی نیازی دا تعلق نیازی قبیلے نال ہئی تے اوہ متوسط گھراݨے نال تعلق رکھدے ہن۔ 1966ء کوں میانوالی توں 10 کلومیٹر دور بمقام روکھڑی وچ پیدا تھئے۔

وفات

29 اگست 2020ء بمطاںق 9 محرم الحرام کوں راولپنڈی دے نجی ہسپتال وچ بعارضہ قلب وفات پا ڳئے۔ نماز جنازہ تے تدفین انہاں دے آبائی علاقہ روکھڑی وچ کیتی ڳئی، مسلم کالونی دے قبرستان وچ سپرد خاک کیتا ڳیا۔ انہاں دے پسماندگان وچ بیوہ، چار بیٹے تے ہک دھی چھوڑی۔ انہاں دا ہک بیٹا ذیشان روکھڑی وی سرائیکی گلوکاری وچ اپݨی پہچاݨ رکھدے۔

اولاد

• ذیشان روکھڑی
• عمران روکھڑی