شبنم اعوان

اصل ناں        عابدہ پروین

قلمی ناں        شبنم اعوان

جمن            1960ء

تعلیم            ایف اے

پیشہ             درس و تدریس، خانہ داری

فون نمبر         03009673414

جاہ پتہ           رحیم یار خان

شبنم اعوان اردو تے سرائیکی دی مایہ ناز شاعرہ ہے، ہن تائیں آپ دیاں اردو ،سرائیکی ملیاں جلیاں 6کتاباں چھپ چکیاں ہن۔شبنم صاحبہ اردو تے سرائیکی دی ہک مشاق شاعرہ ہے تے آپ دا شمار استاذالشاعرات اچ تھیندے۔آپ دی شخصیت تے شاعری تے منہاج القرآن یونیورسٹی توں ایم فِل کیتا گئے۔ضلع رحیم یار خان دی طرفوںآپ کوں ٹیلنٹ خواتین ایوارڈ پیش کیتا گیا۔ڈاکٹر نخبہ لنگاہ آپ دے سرائیکی شعری مجموعہ’’بوچھن‘‘ دا انگریزی ترجمہ کریندیاں پئین،پی ٹی وی تے آپ دا انٹر ویو گھدا گیا تے اعزازیہ وی پیش کیتا گیا۔کئی طلباء و طالبات آپ دی شخصیت تے شاعری تے کم کریندے پئین۔جتھوں تک آپ دی شاعری دا تعلق ہے تاں اوہ صنف نازک ہوون دے ناطے اپنی شاعری اچ عورت ذات دے مسائل تے محرومیاں دی گالھ بھر پور طریقے نال کریندین۔غزلیہ کلام بطور نمونہ حاضر ہے۔

(1)غزل

سک تیڈی نئیں جیون ڈیندی

کیویں لوواں لاواں مہندی

نکھڑیئے ہیں تاں نکھڑیئے رہسوں

نہ او آندے نہ میں ویندی

نندر نئیں آندی اکھیاں اندر

جے آندی ہے خواب نئیں ڈیندی

جوڑا لانویں  والا  اپناں

جِیندی ہوندی آپ ہنڈھیندی

دل اپنے دیاں ونڈیاں کر تے

رہ گئی تیڈے درد ونڈیندی

توں سرمی دا پھُل میں شبنمؔ

میں نئیں تیڈی شان گھٹیندی