سیویاں

اٹے یا میدے کوں پاݨی وچ مل کے تے اینکوں چنگی طرح رسا کے کہیں گھڑے یا ہک سادہ مشین دے ذریعے اٹے کوں وٹ ݙے کے لمبے تے باریک دھاڳے دی طرح لڑی بݨا کے تے انہاں لڑیاں دے لچھے بݨا کے جیہڑی چیز بݨدی اے اونکوں سیویاں آکھدن. انہاں دی ہک ݙوجھی شکل کوں جوڑے آکھدن جیہڑے لمبے لچھے دار ہووݨ دی بجائے چھوٹے چھوٹے ٹوٹیاں دی صورت وچ بݨائے ویندن.

سیویاں کوں ڳڑ یا کھنڈ وچ دیسی گھیو وچ وی پکایا ویندے تے انہاں کوں اکال کے، کھیر پا کے اتے کھنڈ پا کے وی کھادا ویندے. ایہو طریقہ جوّڑے پکاوݨ دا وی اے. لیکن جوّڑیاں کوں کجھ زیادہ بھنیا ویندے. عیدالفطر یا چھوٹی عید دی خاص سوغات سرائیکی وسیب وچ ایہے سیویاں ای ہوندن.