سیف اللہ خان سیفل

اصل ناں    محمدعبداللہ

قلمی ناں    سیف اللہ خاں سیفلؔ

جٖمنْ        1955ء

جاہ پتہ      خان گٖڑھ ڈومہ تحصیل علی پور ضلع مظفر گڑھ

سرائیکی زبان کوں مقبول عام بݨاوݨ وچ سرائیکی شاعریں دا حصہ سب توں زیادہ ہے ، ہزاراں سالاں دی لتاڑ پچھاڑ دے بعد اَحٖ سرائیکی زبان تے سرائیکی ادب کوں جیرھی نویں حیاتی ملی اے اوندی مبارکباد دے سب توں زیادہ حقدار وی اساݙے سرائیکی شاعر ہِن۔ اے حقیقت اے جو اَحٖ سرائیکی زبان وچ ٻہوں اعلیٰ تے اُچے معیار دی شاعری تھیندی پئی اے ، سرائیکی شاعری وچ مقبول عام درجہ عوامی شاعری کوں حاصل ہے ۔ سئیں سیف اللہ خان سیفل دی شاعری جتھاں سرائیکی ادب دی اساس اے ، اُتھاں لوکیں دے دِلیں دی ترجمان وی ہے۔

سیف اللہ خان سیفل دا ہک کریڈٹ اے وی ہے جو اُنہاں سرائیکی شاعری کوں عام کرݨ وچ اہم کردار ادا کیتے ، سیفل خان سیفل سرائیکی وسیب دا شاعر اے جئیں آڈیو کیسٹ وچ اپݨا کلام ریکارڈ کرائے ۔ ایں ویلے تک اُنہاندی شاعری تے مشتمل انہاندی اپݨی آواز وچ کئی درجن آڈیو والیم پورے سرائیکستان وچ شہرت دیاں دھماں مچا ݙتن ، سیفل خان دے ایں عمل نال سرائیکی ماء ٻولی دے ودھارے دا پندھ اڳونہاں تھئے تے سرائیکی ادب دا ڈھیر فیدہ تھئے میں انہاں کوں مبارکباد آہداں۔

اپݨے وسیب ، اپݨی مٹی اَتے اپݨی ماء دھرتی نال محبت کرݨ آلے سیف اللہ خان سیفل15اکتوبر 1955ء سیت پور وچ امیر بخش خان گوپانگ دے گھر پیدا تھئے ، تعلیم حاصل کرݨ دے بعد 1976ء وچ شاعری شروع کیتی تے شاعری دا اُستاد سئیں سید غلام اکبر شاہ آزاد کوں بݨایا ۔ ایں ویلے تک اُنہاندے درجن توں ودھ کتاباں تے کتابچے شائع تھی چُکن ، سیفل خان دی شاعری بارے تبصرہ ایں واسطے نی کیتا جو خوشبو اپݨا تعارف آپ ہوندی اے ۔

حوالہ

·        معروف سرائیکی دانشور سئیں ظہور دھریجہ دی کتاب سرائیکی قلم قبلیہ وچوں چوݨ

غزل

حاتم بنْ سوالی بٖیٹھاں

ڈٖو ہتھیں میں خالی بٖیٹھاں

دل دیوچ ہے گھپ اندھارا

یاد دے ڈٖیوے بٖالی بٖیٹھاں

من ہا اپنْاں میلا برتن

ہنجوں نال اگھالی بٖیٹھاں

سجھ دی اکھ اچ اکھیں پا کے

دل دیاں اکھیں بھالی بٖیٹھاں

ہتھیں پا کے پیار دا تیشہ

پتھر دا دل ڈٖالی بٖیٹھاں

سیفلؔ میکوں فخر وڈٖا ہے

عشق نگر دا والی بٖیٹھاں

٭٭٭