سید رسول صید

اصل ناں       سید رسول

تخلص          صیدؔ

جٖمنْ           1971ء

تعلیم          میٹرک

پیشہ           تجارت

فون نمبر        0332 7654886

جاہ پتہ       محلہ مصطفٰے آباد کندیاں تحصیل پپلاں ضلع میانوالی

سید رسول صیدؔ ڈٖو شعری کتاباں’’محبت بٖہوں ضروری ہے‘‘ تے ’’ تیڈٖے بٖاجھوں‘‘دے خالق ہن صیدؔ صاحب 1988ء وچ  افضل عاجزؔ تے محمود ہاشمی دی راہنمائی وچ اپنْی شاعری دا آغاز کیتا تے ہر صنفِ سخن تے طبع آزمائی کیتی۔ آپ دا شمار ضلع میانوالی دے نمائندہ شعراء وچ تھیندے۔نمونہ کلام حاضر ہے۔

غزل

جڈٖاں زندگی دا پندھ مکسی تڈٖاں ہر آس مک ویسی

تیڈٖے دل کوں قرار آسی میڈٖا وسواس مک ویسی

زمانے دے کسے پل وچ تیڈٖا دیدار تھی پووے

خدا جٖانْے جو صدیاں دی اکھیں دی پیاس مک ویسی

اساڈٖا پیار ہک صورت لکھا گھن توڑ چڑھ سگٖدائے

امیری تے غریبی دا جڈٖاں احساس مک ویسی

خبر نَم جو ہجر تیڈٖے میکوں انجٖ چونڈ ونجٖنْاں ہے

جگر توں خون سک ویسی بدن توں ماس مک ویسی

ڈٖٹھا غیراں دے سنگ تیکوں میں سوچا صیدؔ بٖہوں جلدی

اے سنگ تیڈٖا نِہاموں جئے نہ آسی راس مک ویسی