سید جلال الدین سرخپوش بخاری

سید جلال الدین حیدر سرخ پوش بخاری (1192ء تا 1291ء) اچ شریف، ضلع بہاولپور وچ مدفون سلسلہ سہروردیہ دے ہک مشہور صوفی بزرگ ہن۔ آپ ہندوستان تے سرائیکی وسیب دے ساداتِ بخاری دے جد ہن۔ آپ امیر سرخ تے سید جلال الدین سرخ پوش دے ناں نال وی مشہور ہن۔ جلال الدین حسین المعروف حضرت مخدوم جہانیاں جہاں گشت انہی دے پوترے ہن۔ ہندوستان وچ نبی کریم صلی اللہ علیہ وآلہ وسلم دے تبرکات سب توں پہلے آپ ہی گھن کے آئے ہن۔ ہند و پاک وچ سادات دا مستند ترین شجرہ سادات بخارا دا ہی ہے-

شجرۂ نسب

جلال الدین سرخ بخاری دا شجرہ نسب حضرت علی المرتضیٰ رضی اللہ تعالیٰ عنہ نال ونڄ ملدا ہے آپ آل نبی علیہ السلام تے علی علیہ السلام وچوں ہن۔ اپ دا شجرۂ کجھ ایویں ہے:

”جلال الدین بن سید علی الموئد بن جعفر بن محمد بن محمود بن احمد بن علی اصغر بن جعفر ثانی بن علی نقی بن محمد تقی بن علی رضا بن جعفر الصادق بن محمد باقر بن زین العابدین بن حسین بن علی ابن ابی طالب(علیہ السلام) “۔

ابتدائی حالات

آپ دا ناں جلال الدین حیدر ہئی تے آپ 5 ذی الحجہ 595ھ کوں بخارا (موجودہ ازبکستان) وچ پیدا تھئے۔ ابتدائی تعلیم بخارا ہی توں حاصل کیتی تے بچپن ہی توں روحانی وجوہات توں مشہور تھی ڳئے۔ جوانی توں پہلے ہی انہاں دے 1500 توں ودھ عالم مرید تھی چکے ہن۔ آپ نے بخارا وچ سید قاسم دی دھی سیدہ فاطمہ نال شادی کیتی جنہاں وچوں ݙو ٻال سید علی تے سید جعفر پیدا تھئے۔ بیوی دی وفات دے بعد آپ اپݨے ݙوہاں ٻالاں کوں گھن کے بخارا توں سرائیکی وسیب دے علاقے بھکر اچ ہجرت کیتی۔

خاندان

حضرت جلال الدین حیدر دی پہلی بیوی سیدہ فاطمہ، سید قاسم دی دھی ہن۔ جلال الدین حیدر تے بی بی فاطمہ دے ݙو ٻال، علی تے جعفر تھئے۔ 635ھ وچ سیدہ فاطمہ دے وصال دے بعد جلال الدین حیدر بخارا توں سرائیکی وسیب، بھکر ݙو پتراں سمیت منتقل تھی ڳئے۔ علی تے جعفر بخارا وچ دفن ہن۔

بھکر، سرائیکی وسیب وچ جلال الدین حیدر نے حضرت سید صدرالدین نقوی دے پتر سید بدرالدین دی دھی بی بی طاہرہ (زہرہ) نال شادی کیتی۔ زہرہ تے جلال الدین دے ݙو پتر ہن۔ صدرالدین محمد غوث تے بہاؤ الدین محمد معصوم، انہاں دی اولاد ٹھٹھہ، سندھ، اوچ (دیوگڑھ)، سرائیکی وسیب تے لہور دے اردگرد موجود ہے۔ صدرالدین محمد غوث دی دھی نے جہانیاں جہاں گشت نال شادی کیتی۔