سرائیکی متھالوجی تے جاوید آصف

سئیں جاوید آصف صاحب اپنڑی کتاب سرائیکی متھالوجی عنایت فرمائ. یقینا" میڈے واسطے متھالوجی (اساطیر) ہک نواں نکور ٹاپک ہے.ایں تحقیقی کتاب ایں راز تو پردہ چاتے. تحقیقی کتاب دان کرنڑ تے مرشد دا شکر گزار ہاں اور مبارک ڈینداں جو آپ نے سرائیکی متھالوجی دی پہلی کتاب لکھ تے سرائیکی ادب تے احسان کیتے.

انہاں دی کتاب دا تعارف

کتاب دا تعارف سئیں محمد حفیظ خان لکھۓپر مکمل مضمون پڑھ تے وی پتہ نئ لگدا جو متھالوجی ہے کیا؟ حق تاں اے ہئ جو ابتدائ مضمون اچ متھالوجی دےنال نال کتاب دا تعارف وی کرایا ونجےہا.

جناب سلیم شہزاد کتاب دی تعریف تاں کر گئن پر متھالوجی دا تعارف تشنہ رہ گۓ. ایندا سارا بار جاوید آصف تےآۓ جئیں اپنڑیں گالھ وچ واضح کر تے ڈساۓجو متھالوجی کیکوں آہدن.میکوں پڑھ تے پتہ لگےجو اساطیر دراصل او لوک روایات ہن جنہیں تے ساڈے وڈکے سختی نال کاربند رہین تے مذہبی لوک انہیں کوں توہمات تے کڑکئیاں رسماں آہدے ریہن جیویں جو کاں دا کرکنڑ تے مہمانیں دا آونڑ، رات کوں بہاری ڈیونڑ نال غربت دا آونڑ تے کنڈ پچھو آواز نہ ڈیونڑ وغیرہ.

مذہبی طور تے متھالوجی دی بحث اچ میں سخت مذہبی ہوونڑ دے باوجود کڈاہیں نمی پیا بلکہ میں چاہندا ہم جو ایں شۓ تےکم کیتا ونجے پر ایندا خوبصورت تے استادانہ ایرا بدھنڑ دا اعزاز جاوید آصف دو ویندے.

سرائیکی وسیب دیاں مٹدیاں ہویاں اساطیر ایں کتاب اچ جمع کر تےہک ادبی کارنامہ کیتا گۓ. بہوں سارے سرائیکی شعراء دے اشعار جیہڑے اساطیری حوالے رکھدن جمع کیتے گئن. اےبہوں اوکھا کم ہے پر جفےکٹ تے سئیں جاوید آصف 110 صفحیں وچ ساکوں پورا جہان قید کر تے ڈے ڈتے. اساطیری شعر لکھنڑ آلےشعرا وچ مؤلف دے علاوہ سئیں احمد خان طارق، صفدر کربلائ، عزیز شاہد، حافظ گلاب فیاض، منشو بھٹہ، جمیل جاذب، سعید ارشد، عاشق بزدار، اشو لال، رفعت عباس، ریاض عصمت، مخمور قلندری تے نواز تابش شامل ہن.

کتاب دےچھیکڑ اچ میڈے محبوب یار ساحر رنگپوری کتاب تے سئیں جاوید آصف دی شان اچ ہک مداحی مضمون لکھ تےکتاب کوں بٹا کر چھوڑیۓ... پتہ ہےکیوں؟ جی ہا سرائیکی متھالوجی دی محنت دی تعریف اردو اچ مضمون لکھ تے کیتی نے. رنگپوری یار میکوں اےچنگاں نئ لگیا البتہ جناب دا مضمون جناب آلی کار چنگاں تے مٹھا لگے.تھوڑا جھیاں سڑیپا وی تھۓ...جو جناب اےتک پج گئن تے ملنڑ وی نئ ڈیندے. جاوید آصف سئیں ہک وار ولا مبارکباد، شکریہ تے شکوہ جو میں خود کوں جناب دا سنگتی سمجھدا ہم پر سنگت دی لسٹ اچ ناں کائناں ہئ شاید جناب دا سنگتی بنڑنڑ واسطے اجاں کجھ محنت کرنڑی پوسی فی الحال تھگ گیاں جو تراۓگھنٹیں اچ مکمل کتاب پڑھ تے گزارشات عرض کر چکاں.....(منصور شانی)

حوالے

[[ونکی:سرائیکی متھالوجی تے جاوید آصف]]