سرائیکی دا ٹھیکیدار

اے اُو طعنہ ہے جیرھا اکثر میکوں آپڑیں سرائیکی سجڑیں کنیں ملدے تیں میڈا ہر ویلھے ھکو جواب ھوندے کہ میں نہ کہیں سرائیکی یا کہیں بی سیاسی جماعت دا لیڈر ھاں نہ سیاست پیشہ ھے نہ مقصد، ٹھیکدار تاں او ھن جنھیں سرائیکی دا ناں گھن کے گڈیاں گھدئن سرائیکی قوم دا لہو پی کے رقبے بنڑائن، جنھیں سرائیکی قوم دا ووٹ ویچ کے آپڑیں ناں نال کئ کئ لقب لوائن، ٹھکیدار تاں او ھن جنھیں ساڈیں نسلیں کوں تعلیم کنیں دُور کرکے آپڑاں نسلاں باھر مُلک ءچ پڑھائن، ساڈے سرائیکی وسیب دے ٹھیکدار اکثر پیپلز پارٹی دے پالتو ھن جیندا ثبوت ملتان دا جلسہ ھے، آصف زرداری تیں بلاول دی گچی ءچ نیلی اجرک پواء کے انھیں ثابت کیتے کہ سرائیکی قوم تھاڈی نسل در نسل غلام ھے، اے تاں بھلا تھیوے سرائیکی شعراء تیں لکھاریں دا جیرھے آپڑیں قوم کوں شعور ڈیندے رہ گئین.

اے انھائیں لوکیں دی محبت ھے محنت ھے جو اج سرائیکی قوم دا گھبرو الاونڑ جُوگا تھی پئے، اگر سرائیکی قوم انھیں نیلی پیلی اجرک آلیں تیں بھروسہ رکھنڑ لگ گئ تاں اے دوغلی نسل دے لوک صدیاں توں صرف مفاد پرستی ءچ ساکوں تباہ کیتی آندن، اے نعرہ مریندن حُسین دا ھمدردی کریندن شمر نال، کیرھا سرائیکی قوم پرست ھے جئیں آپڑاں نمائندہ کہیں الیکشن تیں کھڑا کیتے اگر تساں قوم کوں ھک نمائندہ نہوے ڈے سگدے، تھاڈی اجرک ساڈے کہیں لیکھے، اے فیکٹری کہیں بی جاہ تیں چلاؤ ساکوں معاف کرو، میکوں معاف کرائے سچ الاونڑ تیں، سئیں عاشق بزدار سئیں عزیز شاھد، جہانگیر مخلص، جنھیں پیپلز پارٹی دے حق ءچ ترانے لکھئن جنھیں مشاعرے کراکے پیپلز پارٹی دی محبت دا درس ڈتے انھیں کنیں کوئ پُچھے کیا وصول تھئے انھیں لوکیں کنیں انھیں تاں سینٹ ءچ تھاڈی زبان تسلیم نیں کیتی، اگر تساں سرائیکی قوم کوں صرف وسیب دی محبت دا درس ڈیو ھا خوداری دا سبق پڑھاؤ ھا تاں اج ست کروڑ دی عوام کہیں نیازی زرداری تیں لوھاریں دی محتاج نہ ھووے ھا، ساکوں زیادہ خطرہ اج وی گھر دے چوریں کنیں ھے، اج وی کُتی چوراں نال رلی کھڑی ھے، جڈاں، لُوڑھا گھاء کھاونڑ لگ ونجے ول چوریں تیں ڈُوہ نیں ھوندا، زرداری کوں اجرک پواء کے خوش تھیونڑ آلی مخلوق، پگ، پٹکا، اجرک، اے عزتاں ھوندن تیں کہیں عزت دار کوں ڈتیاں ویندن جیرھا انھیں دی لج رکھ سگے، پٹہ سونے دا کُتے دے گل ھووے،، اوندی ذات بدل نیں ویندی، آخری گال میں سرائیکی دا ٹھیکدار نمھی، چوکیدار ھاں.