ستّی نورجنہ جوزنتینی

ستّی نورجنہ جوزنتینی (عربی: سيتي نورجنة جوهانتيني) (انگریزی: Siti Noordjannah Djohantini) (ڄَمَّݨ دی تَرِیخ: ١٥ اگست ١٩٥٨ء) (ڄَمَّݨ دی جاء: یوگیکارتا) انڈونیشیا دی ہِک اسلامی سکالر ہِن۔ اُوہ اِیں ویلے انڈونیشیا وِچ سبھے زنانیاں دی پہلی مسلم تنظیم عیسیہ دی اڳواݨ دے طور تے اپݨی ݙوجھی مُد کِیتے خدمتاں انجام ݙین٘دی پئی ہِن۔ اُوہ ٦ اگست ٢٠١٥ء کُوں بطورِ اڳواݨ اپݨی ݙوجھی مُد کِیتے چُݨی ڳئی ہَن، اُوں ݙیہاڑے اِنّھاں دے پئے حیدر ناشر محمدیہ سوسائٹی دے اڳواݨ دے طور تے اپݨی پہلی مُد کِیتے چُݨے ڳئے ہَن۔ اُنّھاں نے انڈونیشیا وِچ مزدوراں دے حقوق کِیتے پہلی غیر سرکاری تنظیم یاسانتی دی وی سنڳتی بݨیاد رکّھی۔

ستّی نورجنہ دا ڄَم پَل ہِک اِیہو جئیں ٹَٻَّر وِچ تھیا جیڑھا مسلم سول سوسائٹی جَتّھیاں وِچ ٻہوں سرگرم ہئی۔ اِنّھاں نے پرائمری تُوں سیکنڈری تئیں محمدیہ سکولاں وِچ تعلیم حاصل کِیتی، ١٩٨٣ء تُوں ١٩٨٦ء تئیں محمدیہ سٹوڈنٹ ونگ دی نائب صدر رہی، اَتے ١٩٩٠ء تُوں ١٩٩٥ء تئیں عیسیہ دے یوتھ وِنگ دی اڳواݨ رہی، اَتے یوگیکارتا کالج وِچ محمدیہ یونیورسٹی معاشیات سکول وِچ بطورِ لیکچرار کَم کِیتا۔

ٹَٻَّر

ستّی نورجنہ دا ڄَم پَل اَتے پرورش ہِک مذہبی ٹَٻَّر آلے ماحول وِچ تھئی۔ اِنّھاں دے اَبّا سئیں دا ناں اردنی زنال ہئی جاں جو اَمّاں دا ناں ستی جویریہ ہئی۔ حیدر ناشیر ڈاکٹر نال شادی کِیتی، محمدیہ مرکزی انجمن دے اڳواݨ اَتے منظمین وِچُوں ہِک ہِن۔ نورجنہ دے ݙو ٻال تھئے: حلیمہ ندافہ مجاہدہ اَتے نوحہ عالیہ الرحمٰن۔

تعلیمی احوال

نورجنہ دی رسمی تعلیم دا اَغاز جامعہ محمدیہ یوگیکارتا، وَل محمدیہ گوڈین پریپریٹری سکول، اَتے وَل محمدیہ یوگیکارتا سیکنڈری سول تُوں تِھیا۔ اِین٘دے بعد، نورجنہ نے یوگیکارتا وِچ فیکلٹی آف معاشیات، نیشنل ڈویپلمنت یونیورسٹی (ویٹرنز) وِچُوں بیچلر ڈگری پروگرام دی تعلیم حاصل کِیتی، اَتے وَل اِنّھاں نے یوگیکارتا وِچ انڈونیشیا دی اسلامی یونیورسٹی توں فنانشل مینجمنٹ وِچ ماسٹر پروگرام دی ڈگری حاصل کِیتی۔ اِین٘دے تُوں اَنج، نورجنہ نے گڈجا ماڈا یونیورسٹی یوگیکارتا وِچ انسانی وسائل دے انتظام دے پروگرام دا اَغاز کِیتا ہِے۔