ستلج ویلی پراجیکٹ تے پنجابی آباد کاری

1920 وچ برٹش انڈیا گورنمنٹ دھونس دھاندلی نال بہاولپور ریاست کوں مجبور کیتا جو او ستلج ویلی پراجیکٹ نال سَہمت تھیوے۔ بہاولپور ریاست ایں پراجیکٹ کوں دریائے ستلج اتیں حقوق دے حوالے نال ہک وݙا خسارہ سمجھیندی ہئی تے کئی سال ایں پراجیکٹ دی مخالفت کیتی۔

ایں پراجیکٹ دے نتیجے وچ بہاولپور ریاست کوں کئی کروڑ دا قرضہ چاوݨا پیا اتیں اوں قرضے کوں سجاوݨ کیتے 20 لکھ ایکڑ کنیں ودھ ننویں نہری زمین کوں پنجابی آباد کاریں دے ہتھوں ویچݨا پئے ڳیا۔ایندا نتیجے وچ بہاولپور دی آبادی 14 سالیں وچ 9 لکھ 40 ہزار کنیں ودھ 15 لکھ تھی ڳئی۔ 1901 کنیں 1931 وچالے آبادی وچ ودھارا 6.06 فیصدی ہئی۔ جݙاں جو 1931 کنیں 1945 (14 سال) وچ آبادی وچ ودھارا 31.12 فیصدی ہئی۔ بہاولنگر، منڈی یزمان، فورٹ عباس، رحیم یار خان جہیں علاقے پنجابی ڄٹیں، آرائیں، راجپوتیں دے مرکز بݨ ڳئے۔

اے آبادکاری دا سلسلہ اڄاں وی نئیں رکیا۔ سندھ طاس معاہدہ پچھوں وت ہک وݙی پنجابی آبادکاری تھئی۔ کل دے پنجابی آباد کار طارق بشیر چیمہ دی شکل اڄ بہاولپور دے حکمران ہن۔ لوکل سرائیکی ایلیٹ اویں انہیں دی ٻانہہ ٻیل ہے۔ ایں حکمرانی کوں جاری رکھݨ دا ننواں ڈرامہ بہاولپور صوبہ دی تجویز ہے۔