زُلیخا عزیزِ مصر فوطیفار یا پوتیفار دی ذال دا ناں ہِے جیڑھی مصر دیس دی ہئی اَتے روایتاں دے مطابق اَوتری ہئی اِیں کِیتے جو پَئے لاولد ہئی۔ اَتے مصر دے دیس وِچ کیوں جو اِیں ویلے بت پرستی دا دور دورہ ہئی اِیہ وی بت پرست ہئی۔ بائبل وِچ اِیں بندے دا ناں فوطیقار لِکّھیا ہِے جئیں حضرت یوسف علیہ السلام کُوں خرید کِیتا ہئی۔ قُرآن مجید نے اڳّوں ٹُر تے عزیز دے لقب نال اِین٘دا ذِکر کِیتا ہِے۔ اُوہ شاہی خزانے دا یا باڈی گارڈاں دا افسر ہئی۔ تلمود وِچ اِین٘دی ذال دا ناں زُلیخا لِکّھیا ہِے۔ (زُلیخا یا راعیل)۔[١] عزیزِ مصر دی ذال دا ناں راعیل ہئی۔ کوئی آہْدا ہِے جو زُلیخا ہئی۔ اِیہ رعابیل دی دِھی ہئی۔[٢]

زُلیخاں دا کَٹھ

یوسف دا لَبّھݨ لکھو

جیڑھے ویلے حضرت یوسف علیہ السلام کُوں بِھران٘واں نے کُھوہ وِچ سَٹ ݙِتّا تاں ہِک قافلہ دے وݙیرے نے آپݨے ہِک غلام جین٘دا ناں "بشیر" ہئی کُوں بھیڄا جو ون٘ڄ تے کُھوہ وِچُوں پاݨی گِھن آوے تاں بشیر نے ڈول کُھوہ وِچ پاتا اَتے ٻاہر ݙول آیا تاں ڈِٹھوسی جو ہِک ٻہوں سوہݨاں ٻال ݙول اُتے چڑھیا ٻیٹھا ہِے، اَتے بَھڄدا ہویا آپݨے وݙیرے "مالک بِن زعرٗ" دے کول آیا اَتے آکھیوس جو مالک اِیہ ٻال کُھوہ وِچُوں مِلّا ہِے، تاں یوسف دے بِھرا آئے اَتے ویچݨ دا آکھیا اَتے کُجھ پُھٹیاں کوݙیاں (٢٠ پُھٹّیاں کوݙیاں) دے بَدلے بِھرا کُوں ویچ ݙِتونے۔ مالک بن زعر نے حضرت یوسف علیہ السلام کُوں مصر دے بَزار وِچ ویچݨ دی بولی اَلائی اَتے عزیزِ مصر نے آپݨے خزانۂ شاہی دے بدلے حضرت یوسف علیہ السلام کُوں خرید کِیتا، اِیں وِچار نال جو کیوں جو آپ لا ولد ہاں تَہُوں اِیکُوں آپݨاں پُتر بݨیساں۔ حضرت یوسف علیہ السلام شاہی محل وِچ وڑ ڳئے۔ اَتے اُتّھاں دی رون٘قاں ݙِٹّھیاں، ہر خوشحالی تے گھر دی یاد آن٘دی ہئی، چنڳے کھاݨے ݙیکھ تے بھیݨ بِھراواں کُوں یاد کرین٘دے اَتے رنگ برنگے محلّ ݙیکھ تے آپݨاں شہر کنعان یاد کرین٘دے۔

ٻہوں ویلا تقریباً یارھاں سال لنگھݨ دے بعد جیڑھے ویلے جُؤان تھئے تاں زُلیخا نے ہِک ݙیہاڑے آپݨے کوٹھے وِچ اُنّھاں کُوں سݙّیا۔ زُلیخا دا کوٹھا سَت ٻوہیاں دے بعد آن٘دا ہئی۔ اُوہ سَت ٻوہے لنگھ تے زلیخا دے کوٹھے تئیں اَپڑے اَتے ݙِٹُھونے جو زُلیخا آپ کُوں گناہ دے پاسے چِھکݨاں چاہن٘دی ہِے تاں آپ نے فرمایا جو مَیں کین٘ویں گناہ کراں جاں جو میݙا اللہ میکُوں ݙیہدا پِیا ہِے؟ تاں زُلیخا نے وِچار کِیتا جو شاید بُتّاں کَن اشارہ ہِے تاں اُوں نے بَھڄ تے آپݨے بُتاں اُتّے پردہ پاء ڈِتّا اَتے آکھیا جو ہُݨ اَساکُوں کوئیں نِھیں ݙیہدا پِیا؟ تاں آپ نے فرمایا جو اِنّھاں مصنوعی پردیاں تُوں اللہ دی اَکھ کُوں ݙیکھݨ تُوں نِھیں روکیا ون٘ڄ سڳین٘دا کیوں جو اُوہ ہر شے اُتّے قادر ہِے۔ زُلیخا نے آپ کُوں پَھدّݨ دی کوشِت کِیتی تاں آپ نے اللہ سئیں دے حُکم نال ٻوہے کَن بَھڄَّݨ دا اغاز کِیتا اَتے ݙِٹّھا جو ٻوہا کُھل ڳیا اَتے اِین٘ویں اِیہ چِھی ٻوہے لَنگھ ڳئے اَتے سَتّویں تئیں اَپڑے تاں زُلیخا دا ہَتھ آپ دے مونڈھے اُتّے پُڄیا اَتے چولا پڑِیڄ ڳیا اَتے ہُݨ آپ سَتویں ٻوہے وِچُّوں لنگھے۔ جیڑھے ویلے ٻاہر نِکلے تاں ݙِٹّھا جو عزیزِ مصر سامھݨے کھڑوتا ہِے اَتے پُچھیُس جو کیا رولا ہِے؟ تاں زُلیخاں فوراً ٻول پئی جو آپ کیا حُکم فرمیسو اِیں بندے دے بارے وِچ جیڑھا تُہاݙی ذال دے نال غلط ارادہ رکھین٘دا ہووے؟ تاں حضرت یوسف علیہ السلام بولے جو اے عزیزِ مصر مَیں نئیں جاں جو اِیں نے میکُوں غلط ارادے نال سَݙّیا ہئی۔

عزیزِ مصر نے گواہ منڳیا تاں حضرت یوسف علیہ السلام نے فرمایا جو ہِک نِکّا ٻال جیڑھا زُلیخا دا ماسی زاد ہِے اُوہ میݙی اُڳاہی ݙیسی تاں ٻال نے اُڳاہی ݙِتّی جو ڄیکر پُشاک اڳّوں تُوں پڑِیڄی ہِے تاں زُلیخا سچّی ہِے اَتے ڄیکر پِچُّھوں تُوں پَڑِیڄی ہِے تاں یوسف سچّا ہِے۔

جیڑھے ویلے ݙِٹّھا ڳیا تاں چولا پِچُّھوں تُوں پڑِیڄا ہویا ہئی تاں عزیزِ مصر نے زُلیخا کُوں توبیخ کِیتی اَتے آکھیا جو اِیہ سبھ تُساں تِرِیمتاں دا مکّر ہِے۔ اَتے یوسف کُوں آکھیا جو یوسف اِیں معاملے تُوں کنارہ کشی کر اَتے بُھل ون٘ڄ۔ وَل عزیزِ مصر نے یوسف علیہ السلام کُوں قید خانے وِچ پاء ݙِتّا۔ اَتے کئی سال آپ نے مصر دی قید وِچ لنگھائے۔

ٻِیا ݙیکھو لکھو

حوالہ جات لکھو

  1. تفسیر عثمانی مفسر مولانا شبیر احمد عثمانی
  2. تفسیر ابن کثیر حافظ عماد الدین ابوالفداء ابن کثیر