زوار حسین زوار

اصل ناں       زوار حسین

تخلص          زوارؔ

جٖمنْ           1967ء

تعلیم           میٹرک

پیشہ            سرکاری ملازمت

فون نمبر        0300 9417259

جاہ پتہ         خانگٖڑھ ضلع مظفر گٖڑھ

زوار حسین زوار ؔ یکم جنوری 1967ء کوں نوابزادہ نصراللہ خان دے شہر خانگٖڑھ وچ پیدا تھئے۔آپ سرائیکی دے مہاندرے شاعر ہن ۔شعرو شاعری دے حوالے نال ابتدائی راہنمائی کرم حسین شاہ گیلانی (مرحوم) توں حاصل کیتی۔زوار حسین زوار ؔدے 4شعری مجموعے (1) قرآن نیزے تے (2)سچی سانجھ(ڈٖوہڑے)(3) پینگھ(4)حسینؓ میڈٖا،شائع تھی چکے ہِن ۔ جتھوں تک زوارؔ دی غزل دا تعلق ہے تاں خوبصورت غزل لکھدن۔نمونہ کلام۔

غزل

اکھ ڈِٖٹھا تے دل دیوانہ تھی گٖیا

شاعری دا ہک بہانہ تھی گٖیا

اوں نے اکھ جھمکئی تے ہک اکھ نوٹ کے

دل تے حملہ قاتلانہ تھی گٖیا

چندر کوں ڈِٖٹھم تاں اپنْے یار دا

کجھ تعارف غائبانہ تھی گٖیا

دوستی تے دشمنی دے درمیان

ہک تعلق درمیانہ تھی گٖیا

اوندے کیتے رات ہک ہئی ہجر دی

پر میڈٖے کیتے زمانہ تھی گٖیا

میڈٖے حصّے اَئے فقط سجدے زوارؔ

اوندے نانویں آستانہ تھی گٖیا