رمضان نادارؔ

اصل ناں      محمد رمضان

تخلص          نادار

جمن            1953ء 

تعلیم           ایم اے

پیشہ            ریٹائر ملازم نادرا

فون نمبر        03346041859

جاہ پتہ        وہوا تحصیل تونسہ شریف

تحصیل تونسہ دے تل وطنی تمام شعرا دا ہکو المیہ ہے اوہ ہے امیر طبقے دا غریب طبقے تے ڈڈھپ ۔ ہک پاسوں غریب عوام نال ظلم زیادتی تھیندی پئی ہے تے بئے پاسوں انصاف دے علمبر دار اکھ نوٹی کر کے ہر واقعے توں ڈیٹھ پَن دا مظاہرہ کریندن۔ رمضان نادار تونسہ دی دھرتی دا اوہ بے باک شاعر ہے جیڑھا ظالم دی اکھ اچ اکھ پاکے آہدے۔

قلم کاغذ نمائش نئیں فقط نادار ؔ کھیسے دی

قلم مزدور دے حق اچ اُٹھیسوں رنج نہ تھیویں

ایہا ای وجہ ہے جو دامان دا ہر شاعر ظالم جابر دے خلاف مزاحمت کریندا نظر آندے ۔جنہاں اچوں رمضان نادار ہک پُر عزم مزاحمتی شاعر ہے۔کیوں جو اوہ ہک غریب آدمی نال امیر زادے دا متنفرانہ  رویہ ڈیکھ کے بول پوندے تے آہدے۔

بخت والیں دی تفریق دا حال ہے

آدمی توں کریندے کریر آدمی

(1) غزل

اے  رنجش  رُسیمے بھُلا حوصلہ  ڈے

جیکر تھی  سگی  تاں ولا  حوصلہ  ڈے

پتنگے اُڈر  گئے اندھارے  دے ڈر  توں  

ولا گھر  دا  ڈیوا جگا  حوصلہ  ڈے

میڈے وانگ چپ ہیں توں کیوں رات کالی

میڈے نال  کجھ کاں  الا حوصلہ  ڈے

میڈے روح دے اسمان تے کال کوٹ اے

ایں غم دی  گھٹا کوں  ہٹا  حوصلہ  ڈے

اے نادارؔ  غیریں دے  مہنے مریندن  

رقیبیں دے  اَن  سر نوا  حوصلہ  ڈے