رفیق چغتائی

اصل ناں       محمد رفیق

قلمی ناں       رفیق چغتائی

جٖمنْ           1991ء

تعلیم           پرائمری

پیشہ           آجڑی

فون نمبر         0341 6767175

جاہ پتہ         مسلم کوٹ ضلع بھکر

رفیق ؔ چغتائی ہک معمولی پڑھیا لکھیا سدھا سادہ شیشہ دل انسان ہے ،بٖکریاں بھیڈٖاں چریندے۔مگر شعر اپنْی علمی بصیرت توں بٖہوں وڈٖے آہدے ۔حضرت اقبال ؔ سوکڑی دا ہک مصرعہ ہے۔

ع۔میں اپنْے چہرے دے ودھر شیشے دے منہ تے مارین تے کھل پیا ہاں

ہیں مصرعے دے تناظر اچ رفیق چغتائی دا ہک شعر ڈٖیکھو ۔آہدے جو

؎ہن منہ تے ودھر بُٖڈھیپے دے        پر سوچ  رفیق ؔ کنواری  ہے

آپدیاں ڈٖو کتاباں ’’آجڑی‘‘ تے’’ارداس‘‘ وی چھپ چکیاں ہن جڈٖاں جو ترائے کتاباں ’’پرلے پار‘‘ ،’’گنْجے دھاگٖے‘‘ تے ’’چوتھی لکیر‘‘زیرِ ترتیب ہن۔نمونہ کلام۔

غزل

کئی نئیں پچھدا حال اساڈٖے

روندے رہندن بٖال اساڈٖے

رزق دی گٖول اچ رلدے ڈٖیکھو

ست سالاں دے لعل اساڈٖے

کیڑھے پھنّے خان اساں ہیں

گھر ہے پکدی دال اساڈٖے

مار کُریہہ دی سنجٖ کر گٖئی ہے

بکھ توں مر گٖئے مال اساڈٖے

ذہن رفیقؔ خموش کھڑا ہے

سم گٖئی سوچ خیال اساڈٖے