دھرتی دے رکھوالے

،،،،،،، دھرتی دے رکھوالے ،،،،

کجھ ڈینھ پہلے مظفر گڑھ ءچ ہک سکول دی ویگن ءچ بھاء لگی ھئ جئیندے ءچ میڈے وسیب دے ڈُو ُپھل مرجھا گئے ہن اُوں موقعے تے جیرھا کم پولیس آلیں کیتے اوں پاسے دا تھانڑے دار سئیں کلیم اللہ گاڈی تے اوندی ٹیم موقعہ تیں پہنچ کے بلدی بھاء ءچو بچے کڈھین انھیں دی وردی تے ہتھ وی سڑ گئین دل آھدے پورے وسیب دی طرفوں انھیں کوں سلیوٹ ماراں جو انھیں اے ثابت کیتے واقعی اے وردی آلے ساڈے رکھوالے ہن ،ساڈا المیہ اے ھے اساں چند لُوکیں دے وجہ توں سارے محکمے کوں اُوں اکھ نال ڈیھدے ھئیں، جیویں پورے معاشرے ءچ نیکی بدی کٹھے چلدی ھے اُنویں ہر محکمے ءچ وی ہر قسم دے لوک ھوندن ،ایں محکمے ءچو صرف سیاست کڈھ ڈتی ونجے تاں نوے فیصد اے بلکل ٹھیک تھی ویسی ،اساں انھیں دی کرپشن تے تاں کُھل کے گال کریندیں ھئیں پَر ایں محکمے دے شھید ساکوں نئیں نظردے اساں بُھل ویندے ھئیں کہ بھانویں خودکش حملے تھئین یا کہیں معاشرے دے گند نال مقابلہ تھئے کتنے پولیس آلیں آپڑیاں زندگیاں ایں دھرتی تے قربان کیتن ،ساکوں فوج دا شھید نظردے پولیس آلے نال مترائ ماء آلا سلوک کریندے ھیں ،حالانکہ اُو وی کہیں دا جایا ھوندے اوندیاں بھنڑیں تے بھرا اوندا اماں ابا وی انویں تڑپدے جیویں کہیں بے شھید دا تڑپدے ، ہاں خامیاں ضرور ہن مگر اتناں وی نئیں جتناں اساں سمجھی ودے ھئیں ہُنڑ اُو پرانڑے دور تاں رہ نئیں گئے جو تھانڑے دار خود کوں جج سمجھ کے فیصلے ڈیسی ،ہُنڑ تاں ہر بندہ صحافی تے باشعور ھے جڈو غلط کم تھیندا ڈیھدن سوشل میڈیا زندہ باد.

کجھ ڈینھ پہلے میں فیملی نال ھیڈ تونسہ بیراج توں واپس آندا پیاء ھم پُل 22 تک آندیں ھوئیں تریھ لگ گئ میں سیدھا پولیس چوکی تے بریک لائ انھیں کوں آکھئیم محترم پانڑی پلاؤ ھا چا میں اے ڈیکھ تے خوش تھیاں کہ انھیں وڈی عزت نال پانڑی پلایا چاہ بوتل دا پُچھا ،آکھنڑ دا مقصد اے ھے جیویں ساکوں انھیں دے رویے کنوں نفرت ھے اساں وی تاں انویں نفرت کریندے ھئیں اگر ساڈا رویہ انھیں نال پیار محبت آلا ھووے تاں میڈا نیں خیال اے مفت ءچ ساکوں تنگ کریسن ،کجھ لوک انھیں کوں تلاشی ڈیونڑ عیب سمجھدن غیر مُلک ءچ انھیں دا وزیر اعظم کپڑے لہا کے تلاشی ڈیندا کھڑے ھوندے اُتھاں انھیں دی شان ءچ کوئ فرق نئیں پوندا جے آپڑیں پولیس عزت نال تلاشی گھنے تاں سخت ناراض ھئیں، ڈاکو رھزن کنیں موٹر سائیکل چھکوا کھڑسن پولیس آلے کوں اوندے کاغذ ڈیکھالنڑ تے مندے کڈھسن ،آخر تیں آپڑیں بھرا ظفر کوں اے سنھیاء ھے کہ آپڑیں محکمے دی تعریف پڑھ کے خوش نہ تھیویں جتھاں غلط ڈیکھساں گج وج کے لکھساں ،شالا وسدے رھو ،،،،،جمیل بلوچ