دلکش اماموی

دلکش اماموی سرائیکی شاعر ہے

ساڈے  نال  بھورلا   کھل   تے   آلائی   ونج

ویندا تاں او نویں پائیں گل نال لائی   ونج

ایں گیت دے نامور خالق شاعر ،فنکار تے گلو کار سئیں دلکش اماموی سئیں کل جمعرات شام کوں ایں جہان فانی توں کوچ کر گئے جیویں جو محترم سئیں دلنور نورپوری ہوراں دا شعر ہے

دلنور اے دنیاں فانی ہے کوئی آج ویسی کوئ کل ویسی

تے اج انہاں دا نماز جنازہ انہاں دے آبائی قبرستان گوٹھ غنی وچ پڑھایا گیا تے اتھائیں ہی آپ کوں دفن کیتا گیا

دلکش اماموی صاحب ہوراں دا اصل ناں خادم حسین ہا آپ دے والد صاحب دا ناں مولوی فیض بخش ہا تے آپ غنی گوٹھ وچ پیدا تھئے آپ دا تخلص دلکش ہا تے آپ استاد الشعراء استاد صوفی فیض محمد دلچسپ صاحب ہوراں دے پہلے پہلے شاعراں دی فہرست وچ شامل ہن تے آپ ہوراں دے ناں دی نسبت توں ہی آپ دا ناں دلکش رکھیا گیا

اماموی آپ اپنے مرشد امام بخش مہروی دی وجہ توں سڈویندے ہن تے آپ دی زات قریشی  ہئ

آپ عاشق رسول صلی اللہ علیہ وآلہ وسلم ہن تے آپ حمدیہ تے نعتیہ شاعری بہوں کیتی اے آپ نے نظم وی لکھی اے جیندے وچ دھی دا قاتل شامل ہے لیکن بد قسمتی نال انہاں دا کلام کتابی شکل وچ نی شائع تھی سگیا آپ نے دو شادیاں کیتیاں تے زندگی دا ساتھ انہاندے نال ناں چل سگیا تے آپ تن تنہا زندگی فقیرانہ حال وچ اڈہ واہی حسین دے نزدیک کلھی کوٹھی وچ گزریندے پے ہن آپ دی نرینہ اولاد کوئ کائنا ہئی تے ہک دھی ہئ تے آپ مرن توں پہلے کجھ ڈینھ اپنی بیٹی کول موضع منگڑیچہ چیمہ فیکٹری ہائیڈراجکاں روڈگزار آئے

آپ شاعر وی ہن ادیب وی ہن فنکار وی ہن تے گلوکار وی ہن آپ نے تھیٹر وچ وی کم کیتا آپ ریڈیو پاکستان بہاولپور تے وی پروگرام واسطے ویندے ہن تے آپ مختلف پروگراماں تے سٹیج سیکرٹری دے فرائض وی سر انجام ڈیندے رہ گن آپ پولیس وچ بطور سپاہی وی بھرتی تھے لیکن آپ کجھ عرصے بعد معطل تھی گئے ۔ آپ دے بہوں سارے شاگرد ہن جیندے وچ محترم سئیں دلنور نورپوری وی شامل ہن

سرائیکی شعراء کرام دیاں ناں کوئی تنظیماں ہوون دی وجہ توں تے نہ کوئی سرکاری سطح تے اعلیٰ ادبی اداریاں دی سرپرستی نہ ہوون دی وجہ توں ساڈے سرائیکی شعراء کرام نہ صرف بیماریاں دی وجہ توں مردے ویندن تے نہ ہی انہاں دا کلام کوئی شائع  کر تے محفوظ کیتا ویندا پے

اگر اللہ پاک میں فقیر کوں معاف کرے تاں ناں چاہندیں وی ہک روایت ہے جو دلکش صاحب اپنے دوست یار دے محبوب دی خاطر ونجارے وی بݨے ہن دیکھو نہ دوستو ہر کوئی اپنے محبوب اپنے دوست تے اپنے عشق تے عاشقی وچ تاں مجنوں،دیوانہ ،فقیر تے ونجارہ بن ویندے لیکن کوئی اپنے یار کمال دے محبوب کیتے ونجارہ بن دکھاوے تاں پتہ لگ ویندے گال بہوں لمبی تھیندی ویندی ہے اللہ پاک آپ کوں اپنے پیارے محبوب حضرت محمد مصطفی صلی اللہ علیہ وآلہ وسلم دے صدقے جنت الفردوس وچ اعلیٰ مقام عطا کرے میں عرفان اکبر صاحب دا وی شکر گزار ہاں کے انہاں میکوں آپ دی تصویر بھیجی شکریہ دوستو اللہ تعالیٰ آپ سب دوستوں کوں خوش رکھے آباد وشاد رکھے جزاک اللہ

                     ارشد آمشام

وفات

خمیس ١١ مئی ٢٠٢٣ء اڈا واہی حسین

انہاں دا نماز جنازہ انہاں دے آبائی قبرستان گوٹھ غنی وچ پڑھایا گیا تے اتھائیں ہی آپ کوں دفن کیتا گیا

نمونہ کلام

میم کریم دے در اقدس تے سلطان شہنشاہ جُھک ویندن

نئیں رہندے ہوش نوابی دے قصے میں میں والے مُک ویندن

اوندے نوری نور تجلے توں شہباز پکھی اک چُک ویندن

اوندی کالی کملی وچ دلکش بدکار تے مجرم لُک ویندن

شاعر :/مرحوم دلکش اماموی صاحب آف ادہ واہی حسین ( بہاولپور)