دروازہ، حکایت

حکایت

دروازہ : 1

ہک شاعر اساکوں مِلیا ' اساں اونکوں ریسوران گھِن گئے چا پِلوائی تے پُچھیا اوہ شاعری کینویں بنڑیندے " اوہ بولیا

1) میڈے کیتے شاعری لفظیں توں نِسری'لفظ دی تاکڑی کُھلی میکوں سیر جہان تے گِھن گئی' جینویں جو لفظ رِچھ,بیڑی یا سرہیوں اگاں میکوں ٹورن تے بھیت سارا کُھل ونجے

2) ڈاہ بارھاں سالاں پِچھوں میکوں اپنی شاعری دیاں تصویراں نظرن پے گیاں'ایں چِتر کوں بیت بناونڑ دا مراقبہ میں کیتا'جینویں جو اکھیں نُوٹ کے مَتھے دی اشارت وچ کروڑاں ارباں کوہاں دا پندھ کر ونجنڑا'جینویں جو مچھیاں نال ترنڑا پکھیاں نال اُڈنڑا'لوکیں دی بِھیڑ وچ ہکے ویلےاگاں پچھاں ٹُرنڑا

3)اگاں وت خوابیں دا زمانہ آیا'خواب میڈی شاعری دی ورکشاپ بنڑ گئے'سارا ڈینہ نوکری دوستیں کوں ملنڑا تے راتیں جلدی سم ونجنڑا جو خوابیں دے کرخانے وچ بیت بنڑاونڑا ہے'بہوں ساری شاعری میں نندر دی کھڈی اُتے کَتی تے جاگدیاں ایہو کاپ لہایا

4) اگاں وت دیہاں دی کوٹھی دا ویلا آیا'کوٹھی در کوٹھی آکھو دیہ بیٹھے میڈے کیتے بیت بنڑیندے ہِن'حکیم ہِن سنارے ہِن کیمیاگر نِلہاری میڈے کیتے کم پئے کریندن ہِن

5)میں لوکیں دیاں گالہیں توں ہُنڑ بیت بنڑینداں ' اوہ اپنڑیاں گالہیں وچوں شاعری میکوں ڈیندن'اُنہاں دے الا دے وَنڑ توں دھیان میڈے دا میوہ لہندے

اساں اونکوں حُب نال ڈِٹھا تے پُچھیا " کوئی بئی وی رمز اے بیت بنڑاونڑ دی "اوہ مُسکیا تے بولیا " ہا ! ہک شہر وچ ہک تریمت ہے جیڑھی میڈے کیتے بیت بنڑیندی ہِے پَٹھیندی ہِے "

Rifat Abbas