خالد پرویز
ڈاکٹر خالد پرویز جتوئی ضلع مظفرڳڑھ دا رہوݨ آلا ہک سرائیکی شاعر ہے۔
نمونہ کلام لکھو
شعر لکھو
ول کوئی سسی ،ٹر پئی تسی ، تپدی ریت تے پنل دے پچھوں ..
ول کوئی چور مکرانی خالد ، شاهر بهمبهور دا لٹی ویندن.......!!
چوݨی لکھو
میݙے ݙکھ دے گوگڑے درد بهریے
جݙاں پهٹ پوون ایں پهٹی وانگ
توں چوݨی بݨ کے آویں پئی
میݙے جسم دے ھک ھک پھٹ کوں توں
بس آپڑیں ہتهه دا سیک ݙیویں
متاں میݙے پهٹ ، ایں پهٹی وانگ
سونے دے بها تے وک پوون
آ میݙی سوهݨی ، بݨ چوݨی
آ میݙی چوݨی ، بݨ سوهݨی
فقیری لکھو
دل دی میل دهوئیج پووی تاں
اکهه توں پردے لہہ ونجنی تاں
عقل دیاں چیڑیاں گنڈهاں جݙاں ، آپو آپ ای کهل پوون تاں.......
جهک نوائی سکهه پوویں تےفخر توں آکڑیے مونڈهے ڈهاون..........
گردن تهوڑی جهک پووے تے ، کب کنڈے دی آکڑ بهنے........
تیکوں رب دی ساری خلقت آپ سویں... یا چنگی لگے.......
آپڑیں گل جو جهاتی پانویں ، اندر باہر هکو لگے.........
ول بهانویں کشکول وی نہ چا
جو مرضی ، پوشاکاں پا چا....
جیݙا مرضی محل بݨا چا...
جتنا وݙا رتبہ هووی....
اصل فقیر تاں توں هی ہوسیں.......!!
اصل امیر وی توں هی هوسیں.......!!
باقی سب سوانگ بهریندن
پاڑیے چیریے کپڑے پا تے
کچهه کشکول دا زیور لا تے
مندریاں ہتهه، گل مڑکے پا تے
جگ سارے کوں دهوکا ݙیندن
خود کوں آپ فقیر سݙیندن.........!!!!!
جل خالد دے کارے ݙیکهوں
کیویں نفس کوں مارے ݙیکهوں......!!!
ڈاکٹر خالدپرویز
ݙکھ زاد لکھو
جیویں کوئی کم ادهورا رہ ونجے تے یاد نی آندا
جیویں جذبے سجاکے تهی ونجن تے چین نی ہوندا
جیوںں کئی اݨ ݙٹهی شئے دا ہمیشہ خوف راہندا ہے
اینویں قدرت نے میکوں بخش چهوڑیے سنگ ساتهی دا.....
کݙاہیں او ناخدا لگدے
کݙاہیں او رام لگدا ہے
کݙاہیں میکوں سزا لگدے
کݙاہیں انعام لگدا ہے
کݙاہیں تپدی ݙوپہر ہوندے
کݙاہیں او شام لگدا ہے
اوکوں میں آپڑیں اندر وچ گولیندا رہ وینداں خالد..
او میکوں میݙے اندر دا کوئی ھمزاد لگدا ہے...
پتہ نی وہم ہے میݙا یا ول ݙکھ زاد لگدا ہے.....
#خالدپرویز....
ٹاکیاں لکھو
اوں آکهیے... وت ول آویں ها
منڈهه تو یاری، ول لاویں ها
توں تاں ڈهیر ابالها تهی پئیں
کاوڑ کولوں گالها تهی پئیں
رس کے کیڈے منہ چا کیتئی..؟
کیکوں ونج کے ساوا کیتئے..؟
جهیڑے آخر تهی پوندے ہن..
کاوڑ مٹهی تهی ویندی ہے
مافی وی تے هوندی ہے پئی..
اوکوں آخر کون ڈساوے
ونجی راند رساوݨ کیتے
آپ کوں ول وندلاوݨ کیتے
دل دے دانگ لکاوݨ کیتے
ٹاکیاں جسم کوں لاوݨیاں پوندن
روح کو ٹاکی لگ ونجے تاں
ول او کہیں دے کارے کینی
تیڈو واپس ول کے آوݨ
ہݨخالد کوں وارے کینی....!!!
خالدپرویز
آ کوڑ الانوݨ کار کروں لکھو
"آ کوڑ الانوݨ کار کروں.."
او وچهڑݨ ویلها یاد ہوی.. ؟
هک بے کوں آسرے ݙیوݨ لو
اساں گالهیں ڈهیر کریندے رهے
هک بئے کوں سچ الویندے رهے............
تیئں آکهیا ہا میݙی فکر نہ کر
جݙاں عید دا چندر نظر آوے
جݙاں چیتر دی سرمی نسر ونجے
جݙاں ساوݨ ساول گهن آوے
جݙاں هاڑ دے چونسے لہہ پوون
جݙاں پالا پوه دا هݙیں وچ ، برفیں دے وانگوں پہہ ونجے.............
توں میکوں دل نال یاد کریں
جہڑا موسم هوسی اوں پل دا
اوہو موسم بݨ کے آویساں
تیݙی ساری مونجهه لہا ویساں...............
ترسلے میں وی ݙتے هن
میں آکهیا ہا کم کاج دے وچ
روزی روٹی دی چکر ءچ
میں یاد رکهیساں پل پل سب
تیݙی یاد آسی تاں کڈهه آساں
تیݙیاں ونگاں ،مندریاں ، چهلے سب
پا کهٹڑا امب دی چهاں تلے
میں ہاں تے رکهه کے سم پوساں
کجهه نیر اکهیں دی چنڈهه کولوں
وت آپے اپ ای واہسن پے
تیݙی مونجهه لہا کے چن ماهی
وت بکسے سانبهه کے رکهه آساں .................
کئی موسم ہجر دے گذر وی گئے
کئی سال مہینے لنگهه وی گئے
کئی چیتر ، وساخ تے جیٹهه لنگهیے
کئ ساوݨ ، بدرے وس وی گئے
کئی پوہ گذریے کئی پالے وی
کئی ہاڑ تے کئی ہنالے وی
تیکوں ول وی یاد نمهیں آیا
تیݙے ولݨ دا موسم نیئں آیا.................
وت کینجها سنجا میں ہامی
روزی روٹی دے چکر وچ
تیݙیاں مندریاں چهلے گال بیٹهاں
کجهه لوک نویں جو مل پئے می
بئے مندریاں چهلے ݙے گهن تے
میں تیݙی مونجهه وی گال بیٹهاں.............
جیویں جگ کوڑا ، اوویں توں کوڑا
جیویں توں کوڑا ، اوویں میں کوڑا
سچ تیݙے میݙے کوڑ تهئے
سب پیار دے قصے دهوڑ تهئے......
آ هک واری ، ول مل تاں سہی
ول منڈهه توں قول،اقرار کروں
ساکوں راس نی خالد سچ بولݨ
آ کوڑ الاوݨ کار کروں.......!!
خالد پرویز