حمید الفت ملغاݨی

اصل ناں    عبدالحمید

قلمی ناں    حمید الفتؔ ملغانی

جٖمنْ        1959ء

جاہ پتہ      قصبہ سوکڑ تحصیل تونسہ شریف

حمید الفتؔ ملغانی دا تعلق سرائیکی دے ممتاز شاعر سئیں اقبٖالؔ سوکڑی دے نسبتی قصبہ سوکڑ نال ہے۔آپ مٹھی زبان سرائیکی دے مٹھے لہجے دے شاعر ہن۔شاعری توں علاوہ آپ دیاں سرائیکی ادب اچ نثر نگاری دے حوالے نال وی بٖہوں ساریاں خدمات ہن خاص طور تے تحقیق دے میدان اچ آپ دا کم قابلِ تحسین ہے۔پروفیسر ڈاکٹر حمید الفت سرائیکی دانشور ہن۔سرائیکی کتابیات دے حوالے نال انہاں کافی کم کیتے۔

غزل

کوئی گھر دے سوکھ لَو گھر توں سفر تئیں آ گٖئے

کوئی چیتے دے چکر وچ ولدا گھر تئیں آگٖئے

جیندی خاطر زندگی لٹوا ڈٖتم ہک پل دیوچ

اوہو میڈٖا ناں مٹاونْ لو قبر تئیں آگٖئے

روہی ، تھل ،دامان دی حالت پچھنْ سانگے ہونْیں

روہ ودھ کے پردہء دیوار و در تئیں آگٖئے

شام ویلے دا انہیں کیتا ہا وعدہ آ ویسوں

منتظر رہونْ میڈٖاآخر سحر تئیں آ گٖئے

کون ہے الفتؔ سڈٖیندا ڈٖینہ ڈٖوپہریں اجٖ اتھاں

کون اپنْی موت سانگے تھل تے بر تئیں آگٖئے

؎اوکھے سوکھے ویلے دے اے ہن بھئوال سفر وچ

کہیں دی یاد دے بٖلدے ڈٖیوے گھن ونجٖ نال سفر وچ

اکھ پئی پھُرکے ،کاں وی کرکے ،ہتھوں بھورے ڈھہندن

ایویں لگٖدے اجٖ تاں جیویں ہے لجٖپال سفر وچ